Oʻzbekiston va Serbiya savdo-iqtisodiy hamkorlikni kengaytiradi
Oʻzbekiston va Serbiya savdo, investitsiyalar va sanoat kooperatsiyasini, shuningdek, erkin savdo toʻgʻrisidagi bitim boʻyicha muzokaralarga tayyorgarlik koʻrishni muhokama qildilar.
Oʻzbekiston va Serbiya savdo-iqtisodiy hamkorlikni kengaytirish niyatida
7 sentyabr kuni Belgradda Iqtisodiy hamkorlik boʻyicha Oʻzbekiston-Serbiya hukumatlararo komissiyasining birinchi yigʻilishi boʻlib oʻtdi.
Yigʻilish Oʻzbekiston investitsiyalar, sanoat va savdo vaziri Laziz Qudratov hamda Serbiya xalqaro iqtisodiy aloqalar vaziri Nenad Popovich hamraisligida oʻtdi.
Tomonlar savdo-iqtisodiy hamkorlikni kengaytirish, investitsiyalar hajmini oshirish va sanoat kooperatsiyasini rivojlantirishni muhokama qildilar. Erkin savdo toʻgʻrisidagi bitim boʻyicha muzokaralarni boshlashga tayyorgarlik koʻrishga alohida eʼtibor qaratildi.
Hamkorlikning istiqbolli yoʻnalishlari qatorida farmatsevtika, toʻqimachilik sanoati, qishloq xoʻjaligi, muhim minerallar, raqamli texnologiyalar va sunʼiy intellekt tilga olindi.
Yigʻilish ishtirokchilari, shuningdek, ikki mamlakat oʻrtasida yuk tashishni soddalashtirish masalalari va temir yoʻl infratuzilmasi sohasidagi hamkorlik istiqbollarini koʻrib chiqdilar.
Hukumatlararo komissiyaning ikkinchi yigʻilishini 2027 yilda Oʻzbekistonda oʻtkazish rejalashtirilgan.
Tashrif davomida Laziz Qudratov Serbiyaning yirik kompaniyalari rahbarlari bilan ham qator uchrashuv va muzokaralar oʻtkazdi. Tomonlar ishbilarmonlik aloqalarini yanada rivojlantirish va ustuvor yoʻnalishlarda hamkorlik qilish imkoniyatlarini muhokama qildilar.