Oʻzbekiston va Malayziya yarimoʻtkazgichlar sanoatini rivojlantirish masalalarini muhokama qilishdi
Malayziyaning Kuala-Lumpur shahrida O‘zbekiston Respublikasining Malayziyadagi Favqulodda va Muxtor Elchisi hamda O‘zbekiston Respublikasi Iqtisodiyot va moliya vazirligi vakili ishtirokida mamlakatning yetakchi texnologik kompaniyalaridan biri — "Dagang NeXchange Berhad" rahbariyati bilan uchrashuv bo‘lib o‘tdi.
Oʻzbekiston va Malayziya yarimoʻtkazgichlar sanoatini rivojlantirish boʻyicha muzokaralar oʻtkazdi.
Toshkent, Oʻzbekiston (UzDaily.uz) — Malayziyaning Kuala-Lumpur shahrida Oʻzbekistonning Malayziyadagi Favqulodda va Muxtor Elchisi hamda Oʻzbekiston Respublikasi Iqtisodiyot va moliya vazirligi vakili "Dagang NeXchange Berhad" (DNeX) kompaniyasi rahbariyati bilan uchrashdi.
Uchrashuvda Oʻzbekistonda yarimoʻtkazgichlar ekotizimini rivojlantirish, yuqori malakali kadrlar tayyorlash, investitsiyalarni jalb qilish, ilgʻor tajribalarni oʻrganish va almashish, shuningdek, yuqori texnologiyalar sohasida istiqbolli qoʻshma loyihalarni amalga oshirish masalalari muhokama qilindi.
Muzokaralar davomida "DNeX"ning yarimoʻtkazgichlar sanoatidagi salohiyati va ilgʻor tajribasiga alohida eʼtibor qaratildi. "DNeX" raqamli texnologiyalar, axborot-kommunikatsiya xizmatlari, energetika va yarimoʻtkazgichlar yoʻnalishlarida faoliyat yurituvchi Malayziyaning yirik texnologik guruhlaridan biridir. 2021-yilda "DNeX" mamlakatning yetakchi yarimoʻtkazgich ishlab chiqaruvchilaridan biri boʻlgan "SilTerra Malaysia Sdn. Bhd."ning 60 foiz ulushini sotib olgan.
Uchrashuv yakunida tomonlar Oʻzbekistonda zamonaviy yarimoʻtkazgichlar ekotizimini shakllantirish, ilgʻor texnologiyalarni joriy etish, yuqori texnologiyali ishlab chiqarish quvvatlarini rivojlantirish hamda investitsiyaviy hamkorlikni kengaytirish borasidagi oʻzaro manfaatdorligini tasdiqladilar.
Ushbu uchrashuv Oʻzbekiston va Malayziya oʻrtasidagi iqtisodiy aloqalarni mustahkamlash, shuningdek, yuqori texnologiyalar va innovatsion sanoat yoʻnalishlarida yangi sheriklik aloqalarini rivojlantirishga xizmat qiladi. Tomonlar Oʻzbekistonda zamonaviy yarimoʻtkazgichlar ekotizimini rivojlantirish, ilgʻor texnologiyalarni joriy etish, yuqori texnologiyali ishlab chiqarish quvvatlarini kengaytirish hamda investitsiyaviy hamkorlikni izchil rivojlantirish borasida oʻzaro hamkorlikni davom ettirishga tayyor ekanliklarini bildirdilar.