Oʻzbekiston SSPning Gruziyadagi vakili amaliy uchrashuvlardan muayyan bitimlarga oʻtishga chaqirdi

Oʻzbekiston SSPning Gruziyadagi vakili amaliy uchrashuvlardan muayyan bitimlarga oʻtishga chaqirdi

Oʻzbekiston Savdo-sanoat palatasining Gruziyadagi vakili Maka Natsvlishvili ikki mamlakat oʻrtasidagi tovar aylanmasini 1 milliard dollarga yetkazish maqsadini ambitsiyali, ammo toʻliq erishish mumkin boʻlgan vazifa deb hisoblaydi. TPP vakilining soʻzlariga koʻra, 2025 yilda oʻzaro savdo hajmi qariyb 267,6 million dollarni tashkil etdi, bu esa belgilangan darajaga chiqish uchun uni deyarli toʻrt baravarga oshirish kerakligini anglatadi.

Natsvlishvili tayinlov toʻgʻrisidagi sertifikatni 2026 yil 27 oktyabrda Palata raisi Davron Vahobov topshirgan. U Business Shop LLC konsalting platformasining asoschisi va boshqaruvchi direktori, shuningdek Gruziyadagi EurAsia Gulf bosh menejeridir. Uning biznesni rivojlantirish, xalqaro savdo va investitsiyalarni jalb qilish sohasidagi tajribasi 14 yildan oshadi.

Intervyuda u oʻzining kasbiy yoʻli, yangi lavozimdagi vazifalari, ikki mamlakat oʻrtasidagi iqtisodiy munosabatlarning holati, ustuvor yoʻnalishlar va savdo maqsadiga erishish uchun zarur boʻlgan qadamlar haqida soʻzlab berdi.

**Sizni ushbu lavozimga olib kelgan kasbiy yoʻlingiz va faoliyatingizdagi asosiy bosqichlar haqida soʻzlab bersangiz.**

Mening kasbiy yoʻlim 14 yildan ortiq vaqt davomida biznesni rivojlantirish, xalqaro savdo, investitsiyalarga koʻmaklashish, xaridlar, strategik boshqaruv va xalqaro loyihalarni amalga oshirish sohalarida shakllandi.

Ushbu davr mobaynida men turli sohalarda va biznes muhitlarida ishladim. Bu menga kompaniyalar qanday tuzilgani, bozorlar qanday rivojlanayotgani va eng muhimi, biznes imkoniyatlarini barqaror tijorat natijasiga qanday aylantirishni amaliy tushunish imkonini berdi.

Men Business Shop LLC — biznes xizmatlari va konsalting platformasining asoschisi va boshqaruvchi direktoriman. U kompaniyalarni biznesni rivojlantirish, bozorlarga chiqish, investitsiya loyihalari, xalqaro savdo, xaridlar va strategik sherikliklar masalalarida kompleks qoʻllab-quvvatlaydi.

Bundan tashqari, men Gruziyadagi EurAsia Gulf bosh menejeriman. Bu Kavkaz, Markaziy Osiyo va Fors koʻrfazi mintaqasidagi tadbirkorlar, investorlar va institutlarni birlashtiruvchi xalqaro biznes platformasidir. Gruziya Investitsiya palatasi va boshqa xalqaro biznes tashabbuslaridagi ishtirok institutsional hamkorlik, investitsiyalarni ilgari surish va chegaralararo biznes aloqalari sohasidagi tajribamni kengaytirdi.

Kaoliyatimda sanoat ishlab chiqarishi, xaridlar, korporativ sotuvlar va operatsion faoliyatda, shu jumladan CaucasEnergo, Embawood Georgia va ABD & Co kompaniyalarida boshqaruv tajribasi ham boʻlgan. Bu strategik va operatsion ekspertizani birlashtirishga imkon berdi.

Mening rivojlanishimda xalqaro iqtisodiy hamkorlikda, eng avvalo, Gruziya, Markaziy Osiyo, Yevropa va Koʻrfaz mamlakatlari oʻrtasida biznes aloqalarini oʻrnatishda ishtirok etish hal qiluvchi rol oʻynadi.

Bu yoʻlda Oʻzbekiston bilan hamkorlik alohida oʻrin tutadi. Institutsional hamkorlik, biznes tashabbuslari hamda davlat va xususiy sektor vakillari bilan bevosita muloqot orqali men diqqatimni mamlakatlarimizning amaliy iqtisodiy hamkorligiga aylanishi mumkin boʻlgan imkoniyatlarni izlashga tobora koʻproq qaratdim.

Men hamisha xalqaro biznes — bu shunchaki aloqalar oʻrnatish emas, deb hisoblaganman. Bu turli bozorlar manfaatlarini tushunish, bir-birini toʻldiruvchi imkoniyatlarni izlash va uzoq muddatli hamkorlik uchun sharoit yaratishdir.

Shu sababli, Oʻzbekiston Savdo-sanoat palatasining Gruziyadagi vakili etib tayinlanishim mening yoʻlimning tabiiy davomi boʻldi. U mening tajribam, xalqaro aloqalarim va iqtisodiy sheriklikni rivojlantirishga boʻlgan uzoq yillik sodiqligimni birlashtiradi.

**Tayinlovingiz qanday amalga oshdi va asosiy vazifalaringiz nimalardan iborat?**

Mening tayinlanishim Oʻzbekiston Respublikasining Gruziya va Ozarbayjonda akkreditatsiyadan oʻtgan elchixonasining faol ishi, qoʻllab-quvvatlashi va izchil saʼy-harakatlari bilan chambarchas bogʻliq.

Elchixonaning iqtisodiyotlarni yaqinlashtirish, institutsional muloqotni mustahkamlash hamda Oʻzbekiston va Gruziya oʻrtasidagi amaliy hamkorlikni ilgari surishdagi muhim rolini alohida taʼkidlamoqchiman.

Elchixonaning ikki mamlakat biznes hamjamiyatlarini yaqinlashtirishdagi tashabbuskor ishtiroki, tegishli institutlar bilan aloqalarni oʻrnatishga yordam berishi va ikki tomonlama iqtisodiy tashabbuslarni qoʻllab-quvvatlashi ushbu tayinlov uchun muhim asos boʻldi.

Men buni nafaqat kasbiy tajribam va xalqaro biznes sohasidagi mehnatimning eʼtirof etilishi, balki Oʻzbekiston va Gruziya tomonlari oʻrtasida ortib borayotgan ishonch va hamkorlikning aksi sifatida ham koʻraman.

Elchiga va butun diplomatik jamoaga oʻz ishiga sodiqligi, ochiqligi va Gruziya bilan iqtisodiy aloqalarni mustahkamlashga qoʻshgan hissasi uchun chin qalbimdan minnatdorlik bildiraman. Ularning ishi diplomatik institutlar mustahkam ikki tomonlama munosabatlarni muayyan biznes va investitsiya imkoniyatlariga aylantirishda qanday rol oʻynashini koʻrsatadi.

Xalqaro biznes platformalaridagi ishimda, eng avvalo, Business Shop va EurAsia Gulf’da, shuningdek Gruziyadagi investitsiya tashabbuslarida men izchil ravishda kompaniyalar, investorlar va institutlarni bogʻlash hamda chegaralararo sherikliklarni oʻrnatishga yordam berish bilan shugʻullandim.

2026 yil 27 oktyabrda men Oʻzbekiston Respublikasi Savdo-sanoat palatasi raisi Davron Vahobov topshirgan tayinlov toʻgʻrisidagi rasmiy sertifikatni olish sharafiga muyassar boʻldim.

Men ushbu tayinlovda kasbiy muvaffaqiyatni ham, katta masʼuliyatni ham koʻraman.

Mening asosiy maqsadim — Oʻzbekiston va Gruziya oʻrtasida samarali institutsional va biznes koʻprigi boʻlishdir. Men Elchixona, Oʻzbekiston Savdo-sanoat palatasi, Gruziya institutlari va xususiy sektor bilan yaqin muvofiqlikda ishlayman.

Mening majburiyatlarim bir nechta asosiy yoʻnalishlarga qaratilgan.

Birinchisi — savdoni rivojlantirish. Men oʻzbekistonlik ishlab chiqaruvchilar va eksportchilarga Gruziyada va boshqa xalqaro bozorlarda imkoniyatlarni topish va tijorat aloqalarini oʻrnatishda yordam beraman.

Ikkinchisi — investitsiyalarga koʻmaklashish. Vazifa investorlar va kompaniyalarni ikkala mamlakatdagi mos loyihalar, biznes sheriklar va institutsional ishtirokchilar bilan bogʻlashdan iborat.

Uchinchisi — biznes vakilligi. Men Gruziya bozoriga chiqishdan manfaatdor boʻlgan Oʻzbekiston kompaniyalarini qoʻllab-quvvatlayman va Gruziya biznesiga Oʻzbekistonda imkoniyatlar izlashga yordam beraman.

Toʻrtinchisi — institutsional hamkorlik. Gap savdo palatalari, davlat organlari, biznes assotsiatsiyalari va xususiy tashkilotlar oʻrtasidagi kommunikatsiyani mustahkamlash haqida bormoqda.

Beshinchisi — B2B va B2G formatlaridagi biznes-missiyalar va uchrashuvlar. Men maqsadli biznes-missiyalar, sohaviy uchrashuvlar, investitsiya muloqotlari va bevosita muzokaralarni tashkil etish niyatidaman.

Oltinchisi — sanoat va tijorat sherikliklari. Bu qoʻshma korxonalar, ishlab chiqarish kooperatsiyasi, distributsiya kelishuvlari va texnologiyalar almashinuvini qoʻllab-quvvatlashdir.

Meni, ayniqsa, doimiy va tuzilmalashgan biznes muloqotini yaratish, shu jumladan ikki tomonlama biznes kengashini shakllantirish va uning samarali ishlashi qiziqtiradi.

Mening ishim asosida bir printsip yotadi: netvorking (aloqalar oʻrnatish)dan bitimlar tuzishga oʻtish kerak. Hamkorlik muvaffaqiyatini oʻtkazilgan uchrashuvlar va tadbirlar soni bilan emas, balki tuzilgan sherikliklar, imzolangan kontraktlar, jalb qilingan investitsiyalar va yangi bozorlarga muvaffaqiyatli chiqqan kompaniyalar bilan oʻlchash lozim.

**Oʻzbekiston-Gruziya munosabatlarining hozirgi holatini, xususan iqtisodiyot sohasida qanday baholaysiz?**

Men Oʻzbekiston-Gruziya munosabatlari strategik iqtisodiy rivojlanishning juda istiqbolli bosqichiga kiradi, deb aytgan boʻlardim.

Mamlakatlarimizda mustahkam poydevor mavjud: siyosiy muloqot, oʻzaro hurmat va ortib borayotgan institutsional hamkorlik. Shu bilan birga, mening fikrimcha, iqtisodiy potentsial hozirgacha erishilgan hamkorlik darajasidan sezilarli darajada yuqori.

Soʻnggi yillardagi progress umid baxsh etadi. 2017 yildan 2025 yilgacha ikki tomonlama tovar aylanmasi taxminan uch baravarga oshdi va 2025 yilda qariyb 267,6 million dollarni tashkil etdi.

Mamlakatlarimiz oʻrtasidagi erkin savdo rejimi muhim raqobatbardosh afzallik beradi, bevosita aviaqatnovlar va mintaqaviy transport infratuzilmasining rivojlanishi esa biznes uchun qoʻshimcha imkoniyatlar ochadi.

Oʻzbekiston Prezidenti Shavkat Mirziyoyevning 2026 yil iyul oyida Gruziyaga amalga oshirgan davlat tashrifi ikki tomonlama munosabatlarni mustahkamlashda muhim bosqich boʻldi. Ikki mamlakat yetakchilarining muzokaralari hamkorlikni anʼanaviy savdo chegaralaridan tashqariga kengaytirish boʻyicha qatʼiy niyatni koʻrsatdi.

Tovar aylanmasini 1 milliard dollarga yetkazish maqsadi ham ikkala mamlakatning ancha chuqurroq iqtisodiy sheriklikka chiqish intilishini aks ettiradi.

Shunga qaramay, mening ishonchim komilki, keyingi bosqich amaliy amalga oshirishga bagʻishlanishi kerak. Bizga kompaniyalar oʻrtasida koʻproq bevosita aloqalar, jipsroq sanoat kooperatsiyasi, koʻproq investitsion faollik va bir-birining bozorlarida muvaffaqiyatli ishlayotgan koʻproq kompaniyalar kerak.

Gruziya Oʻzbekiston biznesiga Qora dengizga chiqish, rivojlangan logistika infratuzilmasi va xalqaro savdo bitimlarini taklif qilishi mumkin. Oʻzbekiston, oʻz navbatida, salmoqli sanoat, qishloq xoʻjaligi va ishlab chiqarish salohiyatiga ega boʻlgan yirik va jadal rivojlanayotgan bozordir.

Men ushbu munosabatlarda shunchaki ikki tomonlama savdoni emas, balki Kavkaz, Markaziy Osiyo, Yevropa va Fors koʻrfazi mintaqasi oʻrtasida kengroq iqtisodiy bogʻliqlikni barpo etish imkoniyatini koʻraman.

**Ikki mamlakat hamkorligining qaysi yoʻnalishlarini ustuvor deb hisoblaysiz?**

Men hamkorlik sezilarli iqtisodiy natija berishi mumkin boʻlgan bir nechta strategik sohalarni koʻryapman.

**Savdo, ishlab chiqarish va toʻqimachilik**

Bu eng istiqbolli yoʻnalishlardan biridir. Oʻzbekistonda mustahkam ishlab chiqarish bazasi mavjud, ayniqsa toʻqimachilik, kiyim-kechak, poyabzal va boshqa sanoat tovarlari sohasida. Gruziya oʻzbekistonlik ishlab chiqaruvchilar uchun Kavkaz, Qora dengiz boʻyi va Yevropa bozorlariga chiqishda tijorat va logistika maydonchasiga aylanishi mumkin.

Gruziya kompaniyalari, oʻz navbatida, oʻzbekistonlik ishlab chiqaruvchilar bilan sherikliklar yaratishi, qoʻshma ishlab chiqarishlarni ochishi va distributsiya tarmoqlarini oʻzlashtirishi mumkin.

Mening fikrimcha, hamkorlik tayyor mahsulot eksporti doirasidan chiqib, qoʻshma ishlab chiqarish, xususiy brendlar ostida mahsulot chiqarish, texnologiyalar almashinuvi va yuqori qoʻshilgan qiymatga ega mahsulot yaratishni oʻz ichiga olishi kerak.

**Transport, logistika va mintaqaviy bogʻliqlik**

Gruziyaning georafik joylashuvi Markaziy Osiyoni Qora dengiz va Yevropa bozorlari bilan bogʻlashda muhim rol oʻynaydi.

Oʻrta koridor, Transkaspiy xalqaro transport marshruti, Boku — Tbilisi — Kars temir yoʻli, shuningdek Poti va Batumi portlari yanada samarali savdo yoʻnalishlari uchun yaxshi imkoniyatlar yaratadi.

Gruziyada, ayniqsa Poti porti va erkin sanoat zonasi atrofida Oʻzbekiston logistika va savdo xabining tashkil etilishi Oʻzbekiston eksportini oshirishning muhim instrumenti boʻlishi mumkin edi.

**Qishloq xoʻjaligi va oziq-ovqat mahsulotlari ishlab chiqarish**

Qishloq xoʻjaligi ishlab chiqarishi, mahsulotlarni qayta ishlash, sovuq holda saqlash, qadoqlash, agrotexnologiyalar va eksportni rivojlantirishda salmoqli potentsial mavjud.

Oʻzbekistonning qishloq xoʻjaligi imkoniyatlari va Gruziyaning qator agrar mahsulotlar, oziq-ovqatni qayta ishlash va xalqaro bozorlarga chiqishdagi tajribasi bir-birini toʻldirishi mumkin.

Uzumchilik, meva va sabzavotlarni qayta ishlash, yongʻoq (funduk) yetishtirish, chorvachilik va agrologistikadagi qoʻshma loyihalar alohida eʼtiborga loyiqdir.

**Energetika va infratuzilma**

Yana bir muhim yoʻnalish — energetika infratuzilmasi, qayta tiklanadigan energetika, energiya samaradorligi va muhandislik loyihalaridir.

Ikkala mamlakat ham texnik tajriba almashish, investitsiyalarni jalb qilish va infratuzilmani rivojlantirishga xususiy kompaniyalarni jalb qilishdan manfaat koʻrishi mumkin.

**Turizm va mehmonxona biznesi**

Turizm nafaqat sayyohlar oqimini oshirish, balki qoʻshma turistik mahsulotlar yaratish, mehmonxonalarga investitsiya kiritish, mehmonxona sektoridagi sherikliklar va turoperatorlar hamkorligi uchun ham imkoniyatlar ochadi.

**Investitsiyalar va sanoat kooperatsiyasi**

Men investitsiyalarni munosabatlarimizning eng muhim uzoq muddatli oʻlchovlaridan biri deb hisoblayman. Gruziya va Oʻzbekiston kompaniyalarini qoʻshma korxonalar, ishlab chiqarishlar, distributsiya kompaniyalari va boshqa tijorat nuqtai nazaridan barqaror loyihalarni yaratishga undash kerak.

Inson kapitalini rivojlantirishni alohida ajratib koʻrsatmoqchiman. Sanoat hamkorligi malakali kadrlarsiz mumkin emas. Kasbiy tayyorgarlik, kasb-hunar taʼlimi, texnik tajriba almashish va kadrlar bilan tizimli ishlash iqtisodiy sherikligimizning ajralmas qismiga aylanishi kerak.

Oxir-oqibat, menimcha, shunchaki tovar almashishga emas, balki integratsiyalashgan qiymat yaratish zanjirlarini barpo etishga intilish kerak.

**Oʻzbekiston va Gruziya tovar aylanmasini 1 milliard dollarga yetkazish maqsadini qoʻydi. Bu qanchalik real va qaysi muddatlarda?**

Men 1 milliard dollarlik maqsadni ambitsiyali, ammo ikkala mamlakat unga shunchaki raqam sifatida emas, balki strategik iqtisodiy dastur sifatida qarasa, erishish mumkin boʻlgan vazifa deb hisoblayman.

2025 yilda ikki tomonlama tovar aylanmasi qariyb 267,6 million dollarni tashkil etdi. 1 milliard dollarga chiqish uchun uni deyarli toʻrt baravarga oshirish kerak.

Bu jiddiy vazifa, ammo, oʻylashimcha, bunday oʻsish uchun iqtisodiy bir-birini toʻldirish va imkoniyatlar yetarli.

Muhim masala savdo koʻrsatkichlarini oshira olishimizda emas, balki ushbu oʻsishni barqaror qiladigan iqtisodiy mexanizmlarni qanday yaratishdadir.

Mening fikrimcha, buning uchun aniq yillik moʻljallar va sohalar boʻyicha oʻlchanadigan maqsadlarga ega oʻrta muddatli istiqbol kerak. Aniq muddatlar ixtiyoriy ravishda belgilangan siyosiy muddatda emas, balki birgalikda kelishilgan harakatlar rejasida belgilanishi lozim.

1 milliard dollarga chiqish uchun mavjud tovarlar eksportini oshirishning oʻzi yetarli emasligini ham tushunish kerak. Tovarlar va xizmatlarni diversifikatsiya qilish, yangi eksport kategoriyalarini rivojlantirish, sanoat kooperatsiyasi va qoʻshma ishlab chiqarishni kengaytirish, ikkala yoʻnalishda investitsiya oqimlarini oshirish, amaldagi erkin savdo rejimidan yanada toʻliq foydalanish, logistika va distributsiya infratuzilmasini rivojlantirish hamda ishlab chiqaruvchilar, ulgurji savdogarlar va chakana tarmoqlar oʻrtasida jipsroq bevosita aloqalar talab etiladi.

Gruziyadan nafaqat sotuv bozori, balki Oʻzbekiston mahsulotlari uchun boshqa xalqaro bozorlarga chiqish darvozasi sifatida foydalanish ayniqsa muhimdir. Shuningdek, Oʻzbekiston Markaziy Osiyoda oʻz ishtirokini kengaytirishni istovchi Gruziya kompaniyalari uchun muhim maydonchaga aylanishi mumkin.

Taʼkidlab oʻtamanki, tovar aylanmasi — iqtisodiy hamkorlik koʻrsatkichlaridan biri, xolos. Muvaffaqiyatning haqiqiy mezoni investitsiya loyihalarini, qoʻshma korxonalarni, texnologiyalar transferini, ish oʻrinlari yaratilishini va kompaniyalarning bir-birining bozorlarida uzoq muddatli ishtirokini ham oʻz ichiga olishi kerak.

**Unga erishish uchun ikkala mamlakatga qanday qadamlar kerak? Biznes doiralari va savdo palatalari qanday rol oʻynashi mumkin?**

1 milliard dollarga erishish uchun hamkorlik toʻgʻrisidagi umumiy deklaratsiyalardan muvofiqlashtirilgan amaliy amalga oshirish strategiyasiga oʻtish kerak. Men beshta zarur qadamni ajratib koʻrsatgan boʻlardim.

Birinchisi: tuzilmalashgan ikki tomonlama biznes mexanizmini yaratish. Kompaniyalar, investorlar, savdo palatalari, sohaviy assotsiatsiyalar va tegishli davlat organlarini birlashtiradigan doimiy maydoncha kerak. Ikki tomonlama biznes kengashi sohaviy imkoniyatlarni belgilashi, biznes muammolarini hal qilishi va kelishilgan tashabbuslar bajarilishini kuzatib borishi mumkin edi.

Ikkinchisi: umumiy netvorking-tadbirlari oʻrniga maqsadli biznes-missiyalarni tashkil etish. Missiyalarni ishtirokchi kompaniyalarning real tijorat manfaatlari atrofida qurish kerak. Ularning har biridan oldin kompaniyalar nimani sotib olmoqchi, sotmoqchi, ishlab chiqarmoqchi, nimaga investitsiya kiritmoqchi yoki birgalikda rivojlantirmoqchi ekanini aniqlash lozim. Shundoq ekan, tashkilotchilar tegishli B2B va B2G uchrashuvlarini uyushtirishlari, potentsial sheriklarni tanishtirishlari va bevosita muzokaralarga yordam berishlari mumkin boʻladi. Maqsad — shunchaki odamlarni bir zaliga yigʻish emas, balki oʻlchanadigan tijorat natijasini olishdir.

Uchinchisi: bozorlarga kirishni va eksportni ilgari surishni mustahkamlash. Kompaniyalarga tartibga solish, sertifikatlash, bojxona tartib-omillari, sotuv kanallari, soliqqa tortish va bozor talablari haqida amaliy axborot kerak. Gruziya kompaniyalarining Oʻzbekistondagi koʻrgazmalar va biznes-forumlarda ishtirok etishini ragʻbatlantirish hamda Gruziyada oʻzbekistonlik ishlab chiqaruvchilar va ularning mahsulotlarini faol ilgari surish lozim.

Toʻrtinchisi: qoʻshma sanoat va investitsiya loyihalarini rivojlantirish. Ikkala mamlakat tijorat potentsialiga ega muayyan loyihalarni, shu jumladan toʻqimachilik ishlab chiqarishi, oziq-ovqat mahsulotlarini qayta ishlash, logistika, energetika, qurilish va sanoatni belgilab olishi kerak. Biznesni qoʻshma korxonalar yaratishga hamda Gruziyaning erkin savdo toʻgʻrisidagi bitimlari va uning xalqaro tijorat aloqalaridan qoʻshimcha bozorlarga chiqish uchun foydalanish yoʻllarini izlashga undash lozim.

Beshinchisi: inson kapitali va institutsional hamkorlikka investitsiya kiritish. Kasbiy tayyorgarlik, texnologiyalar almashinuvi va malakali kadrlar tayyorlash barqaror sanoat oʻsishi uchun zarurdir. Savdo palatalari, shuningdek, kadrlar tayyorlash bozorning real talabiga javob berishi uchun taʼlim muassasalari, kasb-hunar taʼlimi markazlari va xususiy kompaniyalar oʻrtasida aloqa oʻrnatishi kerak.

Oʻzbekiston Savdo-sanoat palatasining Gruziyadagi vakili sifatida men oʻz rolimni ushbu jarayonda faol ishtirok etishda koʻraman: imkoniyatlarni izlash, kerakli sheriklarni bogʻlash, institutsional muloqotga koʻmaklashish va loyihalarni dastlabki muhokamalardan tortib amaliy amalga oshirishgacha kuzatib borish.

Shuningdek, Gruziya va Oʻzbekiston anʼanaviy ikki tomonlama format chegaralaridan chiqishi kerak, deb hisoblayman. Biz birgalikda Markaziy Osiyo, Kavkaz, Qora dengiz va Fors koʻrfazi mintaqasini bogʻlaydigan mustahkamroq iqtisodiy koridorni barpo etishimiz hamda kompaniyalarga yangi bozorlar va xalqaro investitsiyalarga chiqish imkoniyatini ochishimiz mumkin.

Mening vazifam oddiy: men koʻproq Oʻzbekiston mahsulotlari Gruziya orqali xalqaro bozorlarga muvaffaqiyatli chiqayotganini, koʻproq Gruziya kompaniyalari Oʻzbekistonda oʻz ishtirokini ochayotganini va qoʻshma loyihalar ikkala mamlakatda real iqtisodiy qiymat yaratayotganini koʻrishni xohlayman.

1 milliard dollarlik maqsad yakuniy nuqta boʻlmasligi kerak. U ancha chuqurroq va ambitsiyali iqtisodiy sheriklik uchun boshlangʻich nuqtaga aylanishi lozim.

Mustahkam institutsional qoʻllab-quvvatlash, faol diplomatik ishtirok, jalb qilingan biznes hamjamiyati va natijaga qaratilgan amaliy yondashuv mavjud boʻlganda, biz ushbu ambitsiyani real iqtisodiy haqiqatga aylantira olishimizga ishonaman.