Oʻzbekiston simli internet tezligi boʻyicha MDHda birinchi oʻringa chiqdi
Bu natija ortida tarmoqlarni yillar davomida modernizatsiya qilish boʻyicha olib borilgan ishlar yotibdi. Bu ishlarni butun soha: mamlakatdagi aloqa operatorlari va internet-provayderlari, shuningdek, magistral infratuzilmasidan butun bozor foydalanadigan Uztelecom olib bordi. «ICT Week Uzbekistan 2026»da bu hamkorlik yanada kengaydi.
Oʻzbekiston simli internet tezligi boʻyicha MDHda yetakchilik qildi
Speedtest Global Index maʼlumotlariga ko‘ra, 2026-yil avgust oyida Oʻzbekiston statsionar internet tezligi bo‘yicha MDH davlatlari orasida birinchi o‘rinni oldi. O‘rtacha yuklab olish tezligi 94,50 Mbit/s ni tashkil etdi. Mobil internet tezligi esa 62,42 Mbit/s dan 65,27 Mbit/s gacha oshdi.
So‘nggi bir necha yil ichida uy internetidan foydalanish talablari sezilarli darajada o‘zgardi: kontent hajmi kattalashdi, qurilmalar soni ko‘paydi, bir xonadondagi foydalanuvchilar ham ortdi. Ilgari 30 va 50 Mbit/s tezliklar bunday yuklama uchun yetarli emas edi.
Bu ehtiyoj birgalikda qondirildi. Oxirgi bir yil ichida deyarli barcha keng polosali ulanish operatorlari ommaviy tariflarda tezlikni oshirdi, odatiy taklif 100 Mbit/s ga aylandi. Ko‘pchilik esa tezlik bilan birga abonentlarga yangi xizmatlar, jumladan, televideniye taqdim etish uchun tarmoqlarini modernizatsiya qilishga sarmoya kiritdi. Bunday o‘sish umumiy asosga tayanadi: magistral kanallar, mintaqaviy tugunlar va xalqaro tutashmalar, ularning katta qismi Uztelecom tarmog‘iga kiradi. Kompaniyaning o‘zi esa bozordagi yuqori tezlik darajasini saqlab qoldi va 150 Mbit/s tariflarni taklif qildi.
Uztelecom bir vaqtning o‘zida mobil aloqa operatori, keng polosali ulanish operatori va IT infratuzilmasi — bulutli xizmatlar hamda tijorat maʼlumotlar markazlari — provayderi hisoblanadi. Mamlakat ichida qamrovni kengaytirish, tezlikni oshirish va hisoblash infratuzilmasini yaratish «Raqamli Oʻzbekiston - 2030» strategiyasining vazifalariga kiradi.
Kompaniya tarmog‘idan faqat o‘z abonentlari foydalanmaydi. Butun IT sanoatining katta qismi uning magistral kanallariga tayanadi: mintaqaviy provayder yangi hududni ulaganida, trafik odatda shu tarmoq orqali dunyoga chiqadi.
Aloqa operatorlari bir-birlariga kanallar va tarmoq sig‘imini taqdim etadi, hamkorlarining maydonlariga uskunalarni joylashtiradi, ularning bulutli resurslaridan foydalanadi. Abonent bu bozorni ko‘rmaydi, biroq provayder yangi hududni qanchalik tez ulashi va qanday tezlikni ta’minlashi aynan shunga bog‘liq.
Uztelecom mamlakatning yetakchi aloqa operatorlari va internet-provayderlari bilan hamkorlik qiladi. Ular orasida Mobiuz, Ucell, Beeline, Sarkor, Comnet va Turon bor. Bu hamkorlik bir necha yildan beri davom etib kelmoqda. ICT Week Uzbekistan 2026 ko‘rgazmasida esa kompaniya hamkorlik doirasini yana bir qator hamkorlar bilan kengaytirdi: tomonlar birgalikda foydalaniladigan tarmoq resurslari hajmini oshirish va infratuzilmani rivojlantirishni davom ettirishga kelishib oldilar.