Oʻzbekiston Rossiyadan har yili 7000 bosh zotdor sigir sotib olishni rejalashtiryapti
Rossiyadan Oʻzbekistonga 500 ming tonna bugʻdoy import qilinishi mumkin. Buning uchun Astraxan va Maxachqalʼa portlaridan foydalanish mumkin.
Oʻzbekiston Rossiyadan har yili 7000 bosh zotdor sigir xarid qilishni rejalashtirmoqda
Oʻzbekiston Rossiyadan gʻalla va naslli qoramol olib kelishga qiziqish bildirayotgani haqida xabar berildi.
11-sentabr kuni Moskvada SSP rahbari Davron Vahabov va STEP agroxolding bosh direktori Andrey Nedujko oʻrtasida uchrashuv boʻlib oʻtdi.
Uchrashuvdagi asosiy mavzulardan biri Oʻzbekistonga har yili 7000 bosh golshtein zotli naslli qoramol olib kirish taklifi boʻldi. Ularni mahallalardagi oilalarga taqsimlash rejalashtirilmoqda. Taʼkidlanishicha, bu zotdagi sigirlar sutkasiga 40 litrgacha va undan ham koʻproq sut berishi mumkin.
Mazkur tashabbus oilaviy tadbirkorlikni rivojlantirish, aholiga barqaror daromad manbaini yaratish va oilalarning kambagʻallikdan chiqishiga koʻmaklashadi.
Shuningdek, Rossiyada hosil yuqori boʻlgani sababli Kaspiy dengizi orqali Oʻzbekistonga 500 ming tonna bugʻdoy yetkazib berish masalasi ham muhokama qilindi. Buning uchun Astraxan va Maxachqalʼa portlaridan foydalanish rejalashtirilmoqda.
Yana bir ustuvor yoʻnalish sut va qandolat mahsulotlari ishlab chiqarishni mahalliylashtirish masalasi boʻldi. Uchrashuv yakunida tomonlar qoʻshma loyihalarni amalga oshirishning aniq mexanizmlarini ishlab chiqishga kelishib oldi.