Oʻzbekiston moliyaviy jarimalarni qoʻllash tartibini soddalashtiradi
Majlisda moliyaviy jarimalarni qo‘llash tartibini belgilash, ular ustidan shikoyat qilish hamda noqonuniy undirilgan mablag‘larni qaytarishga qaratilgan qonun loyihasi birinchi o‘qishda muhokama qilindi.
Oʻzbekiston moliyaviy jarimalarni qoʻllash tartibini soddalashtirishga qaratilgan qonun loyihasini muhokama qildi.
Toshkent, Oʻzbekiston (UzDaily.uz) — Oʻzbekistonda moliyaviy jarimalarni qoʻllash, ular ustidan shikoyat qilish va noqonuniy undirilgan mablagʻlarni qaytarish tartibini belgilovchi qonun loyihasi birinchi oʻqishda koʻrib chiqildi.
Ushbu hujjat moliyaviy jarimalarni qoʻllashning yagona, aniq va shaffof tizimini yaratish, shuningdek, moliyaviy sanksiyalarni ixtiyoriy va yengillashtirilgan tartibda ijro etish mexanizmlarini joriy etishni maqsad qilgan.
Qonun loyihasi tadbirkorlik subyektlarining huquq va qonuniy manfaatlarini ishonchli himoya qilishni nazarda tutadi. Bu moliyaviy jarima qoʻllash toʻgʻrisidagi qarorlar ustidan yuqori turuvchi organga yoki sudga shikoyat qilish imkoniyatini beradi, shuningdek, qonunga xilof ravishda undirilgan mablagʻlarni oʻz vaqtida va toʻliq qaytarishni taʼminlaydi.
Loyihada sud nazoratining samaradorligini oshirish va moliyaviy javobgarlikni qoʻllash tartibini yanada soddalashtirish ham belgilangan. Bu tadbirkorlarni asossiz yoki ortiqcha moliyaviy jazolardan himoya qilishga xizmat qiladi.
Hujjat moliyaviy jarimadan ozod etish yoki uni olti oy davomida boʻlib-boʻlib toʻlash imkoniyatini yaratadi. Bundan tashqari, sud tomonidan bekor qilingan yoki haqiqiy emas deb topilgan jarima summasini qisqa muddatlarda qaytarish, kechiktirilgan taqdirda esa foiz toʻlash tartibini joriy etish koʻzda tutilgan.
Majlisda qonun loyihasining qabul qilinishi huquqbuzarliklarni ixtiyoriy ravishda bartaraf etishni, qoʻllanilgan moliyaviy majburiyatlarning oʻz vaqtida toʻlanishini ragʻbatlantirishni hamda davlat organlari va tadbirkorlik subyektlari oʻrtasidagi munosabatlarni soddalashtirishni taʼminlashi taʼkidlandi.
Muhokamalardan soʻng, qonun loyihasi deputatlar tomonidan birinchi oʻqishda qabul qilindi.