Oʻzbekiston bayrogʻi Nyu-York markaziy koʻchasida 10 kun hilpiraydi

Oʻzbekiston bayrogʻi Nyu-Yorkning markaziy koʻchasida 10 kun davomida hilpiraydi. 30-avgust kuni Nyu-Yorkning Manhetten hududidagi mashhur Wall Street koʻchasida Oʻzbekiston mustaqilligining 35 yilligi munosabati bilan davlat bayrogʻi koʻtarildi. Endi ushbu markaziy koʻchada bayroq 10 kun davomida hilpirab turadi.

Bu yil Oʻzbekiston mustaqilligi eʼlon qilinganiga 35 yil toʻlmoqda. Bayram shukuhi nafaqat Respublika ichkarisida, balki butun dunyo boʻylab tarqalgan. Oʻzbek jamiyatlari va diplomatik korpuslar birgalikda turli bayram va marosimlarni oʻtkazishmoqda.

Marosimda Oʻzbekistonning BMTdagi vakolatxonasi rasmiylari, AQShdagi oʻzbek jamiyatlari raislari va aʼzolari, shuningdek, vatandoshlar ishtirok etishdi. Ikki davlat madhiyalari yangradi. Diplomatlar oʻzbeklarni bu yerga kelishga chorladi.

Kun.uz bilan suhbatlashgan “Mahalla USA” Oʻzbekiston-Amerika jamiyati raisi Abdumalik Ahmedovning fikricha, bugun hech qaysi oʻzbek Vatanda boʻlayotgan ishlarga befarq emas. "Vatanni sevish geografiya tanlamaydi, tarixda buyuk davlatchiligimiz boʻlgan. AQShda yashovchilar ayniqsa bugungi Oʻzbekistonga befarq emas", dedi u.

AQSh Moliya va soliq departamenti eksperti boʻlib ishlovchi yana bir yurtdoshimiz Mukarramxon Egamberdiyeva esa Oʻzbekistondagi oʻzbek tilidagi yigʻinlarni sogʻinganini taʼkidladi. "Oila bolalarimizga oʻzbek tilida soʻzlashishlarini aytib, buni qila olishimiz kerak deb bilaman. Men oʻzbek tilida boʻluvchi yigʻinlar, uchrashuvlarni doim sogʻinaman", dedi u.

Eslatib oʻtamiz, bu yilgi bayram AQShning turli hududlarida boʻlib oʻtmoqda. Masalan, 29-30-avgust kunlari Filadelfiyada, 30-avgustda Nyu-Yorkda boʻlsa, sentabr boshida poytaxt Vashington shtati va qator hududlarda tadbirlar rejalashtirilgan. Sietlda esa bosh konsullik ochilishi boʻlib oʻtadi.