Oʻzbek qovunlari Britaniyaga samolyotda yetkazib berilmoqda
Oʻzbekistonda yetishtirilgan «Kelin barmoq» uzumi hamda «Torpeda», «Koʻkcha» va «Obi novvot» qovunlarini Buyuk Britaniyaga yetkazib berish boshlandi. Mahsulotlar Uzbekistan Airwaysʼning muntazam aviaqatnovlari orqali eksport qilinmoqda.
Oʻzbek qovunlari Britaniyaga samolyot orqali yetkazilmoqda
Oʻzbekiston qishloq xoʻjaligi mahsulotlari eksporti geografiyasini kengaytirish doirasida mahalliy uzum va qovunlarning yangi navlari Buyuk Britaniya bozoriga chiqarildi.
Bu haqda «Dunyo» axborot agentligi ma’lum qildi.
Oʻzbekistonning Londondagi elchixonasi ko‘magida Britaniyaning Capital Foodservice kompaniyasi oʻzbek meva-sabzavot mahsulotlarini import qilishni boshlagan.
Xususan, Buyuk Britaniyaga Oʻzbekistonda yetishtirilgan «Kelin barmoq» navli uzum, shuningdek, «Torpeda», «Koʻkcha» va «Obi novvot» navli qovunlar yuborilmoqda.
Eksport qilinayotgan mahsulotlarni Britaniyaga tez yetkazish uchun havo transportidan foydalanilmoqda. Qishloq xoʻjaligi mahsulotlari Uzbekistan Airways aviakompaniyasining muntazam reyslari orqali manzilga olib borilmoqda.
Meva-sabzavot mahsulotlarini Buyuk Britaniyaga yetkazib berish jarayoni mavsum oxirigacha muntazam davom ettirilishi rejalashtirilgan.
Qayd etilishicha, ushbu hamkorlik Oʻzbekiston qishloq xoʻjaligi mahsulotlarining Britaniya bozoridagi ishtirokini kengaytirish, mahalliy meva-sabzavotlarga boʻlgan talabni oshirish hamda oʻzbek mahsulotlarining xorijdagi nufuzini mustahkamlashga qaratilgan.
Shu tariqa, Buyuk Britaniyaga eksport qilinayotgan oʻzbek qishloq xoʻjaligi mahsulotlari assortimenti «Kelin barmoq» uzumi va qovunning bir nechta mahalliy navlari hisobiga kengaymoqda.