Oʻsimlik moyini ham majburiy markirovkalash taklif qilinmoqda
Soliq qoʻmitasi 2027-yil 1-iyuldan boshlab oʻsimlik moyini majburiy raqamli markirovkalash boʻyicha hukumat qarori loyihasini jamoatchilik muhokamasiga qoʻydi. Hozirda markirovkalash talabi qoʻyilgan mahsulotlar roʻyxatiga tamaki mahsulotlari, alkogolli va alkogolsiz ichimliklar, dori vositalari va maishiy texnika kiradi.
Oʻsimlik moyini majburiy markirovkalash ham taklif etilmoqda
Soliq qoʻmitasi oʻsimlik moyini raqamli markirovkalash haqidagi Vazirlar Mahkamasi qarori loyihasini jamoatchilik muhokamasiga chiqardi. Loyiha qabul qilinsa, majburiy markirovka 2027-yil 1-iyuldan boshlab kuchga kirishi mumkin.
Hujjatning preambulasiga koʻra, tashabbus oʻsimlik moyini ishlab chiqarish va sotishni raqamlashtirish, shuningdek uning noqonuniy olib kirilishi, ishlab chiqarilishi va sotilishi holatlarining oldini olishga qaratilgan.
Talab TN VED boʻyicha 1507–1515 guruhlariga kiruvchi moylarga nisbatan qoʻllanadi. Ular orasida soya, yeryongʻoq, zaytun, palma, kungaboqar, kiroz (saflor), paxta, kokos, raps va boshqa oʻsimlik moylari bor.
Markirovka isteʼmol qadogʻiga (tashqi yoki ichki) yopishtiriladigan shtrix-kodli stiker orqali amalga oshiriladi. Ishlab chiqaruvchilar, importchilar, shuningdek ulgurji va chakana savdo bilan shugʻullanuvchi tashkilotlar “Asl belgisi” milliy markirovka va mahsulotni kuzatish tizimiga ulanadi. Tizim operatori — CRPT Turon kompaniyasi. Markirovkalangan mahsulotning muomalaga kiritilishi, aylanishi va muomaladan chiqarilishi tizim orqali kuzatib boriladi.
Markirovka kodi boʻlmagan majburiy markirovkalangan oʻsimlik moyini sotish savdo qoidalarini buzish deb topiladi va qonunchilikka muvofiq javobgarlikka tortiladi. Talablarga rioya etilishini nazorat qilishni soliq organlariga yuklash taklif qilinmoqda.
Hujjat loyihasi boʻyicha jamoatchilik muhokamasi 24-oktabrgacha davom etadi.
Maʼlumot uchun, hozirda Oʻzbekistonda majburiy raqamli markirovka tamaki mahsulotlari, alkogolli va alkogolsiz ichimliklar (shu jumladan ichimlik suvi), dori vositalari hamda maishiy texnikaga tatbiq etilgan.
Raqamli markirovka tizimi 2020-yildan beri bosqichma-bosqich kengaytirib kelinmoqda. Avvalroq suv va alkogolsiz ichimliklar agregatsiyasini joriy etish 2027-yil 1-aprelgacha kechiktirilgan edi.