O‘zbekistonning xalqaro zaxiralari avgustda 72,1 mlrd dollarga yetdi

O‘zbekistonning xalqaro zaxiralari avgustda 72,1 mlrd dollarga chiqdi

O‘zbekiston Markaziy bankining oltin-valyuta zaxiralari avgust oyi yakunida 64,4 milliard dollardan 72,1 milliard dollarga ko‘tarildi. Bu haqda O‘zbekiston Respublikasi Markaziy banki ma’lum qildi.

Bir oy ichida xorijiy valyutadagi zaxiralar hajmi 7,7 milliard dollardan 6,6 milliard dollarga kamaydi.

Jami zaxiralarning oshishida asosiy ulush oltin hissasiga to‘g‘ri keldi: zaxiralar tarkibidagi oltin qiymati 8,8 milliard dollarga ko‘payib, 64,9 milliard dollarga yetdi. Oltinning fizik hajmi esa 13,8 milliondan 14,1 million troy unsiyaga oshdi.

Oltin zaxiralari qiymatining ko‘tarilishi jahon bozorida qimmatbaho metall narxining oshishi bilan bir paytga to‘g‘ri keldi. Avgust oyida oltin narxi 13,6 foizga qimmatlab, bir troy unsiya uchun 4602 dollarga chiqdi. 7 sentyabr holatiga ko‘ra, kotirovkalar bir unsiya uchun qariyb 4400 dollargacha tushdi.

Iyul oyida keskin qisqarganidan keyin, tartibga soluvchining portfelidagi xalqaro qimmatli qog‘ozlar hajmi avgustda deyarli o‘zgarmadi va 1,8 milliard dollarni tashkil etdi. Ularning xalqaro zaxiralar tarkibidagi ulushi qariyb 2,4 foizga teng.

Umuman olganda, hozir O‘zbekistonning jami xalqaro zaxiralarining qariyb 90 foizi oltin hisobiga to‘g‘ri keladi, xorijiy valyutadagi zaxiralar ulushi esa taxminan 9 foizni tashkil etadi. Zaxira aktivlarining qolgan qismi maxsus qarz olish huquqlari (SDR)dan shakllangan bo‘lib, ularning hajmi avgust oyi oxirida 571 million dollarni tashkil etgan.