O‘zbekistonning tashqi savdosidagi eng yirik hamkorlari ma’lum qilindi
2026-yilning 8 oyida O‘zbekiston 200 dan ortiq mamlakat bilan savdo qildi
O‘zbekistonning tashqi savdodagi eng yirik hamkorlari e’lon qilindi. Milliy statistika qo‘mitasi ma’lumotiga ko‘ra, 2026-yilning dastlabki 8 oyida O‘zbekistonning tashqi savdo aylanmasi 57,4 mlrd AQSh dollariga yetgan.
Ushbu davrda mamlakat dunyoning 200 dan ortiq davlati bilan savdo aloqalarini amalga oshirgan. Savdo aylanmasi hajmi bo‘yicha Xitoy birinchi o‘rinni egallagan.
Xitoy bilan tashqi savdo aylanmasi 13,2 mlrd dollarni tashkil etgan. Rossiya bilan savdo hajmi 9,2 mlrd dollarga yetgan.
Qozog‘iston O‘zbekistonning uchinchi yirik savdo hamkori bo‘lib, ikki davlat o‘rtasidagi savdo aylanmasi 3,7 mlrd dollarni tashkil qilgan. Turkiya bilan bu ko‘rsatkich 1,9 mlrd dollarga yetgan.
O‘zbekistonning Afg‘oniston bilan tashqi savdo aylanmasi 1,4 mlrd dollarni tashkil etgan. Koreya Respublikasi bilan savdo hajmi 1,3 mlrd dollarga yetgan.
Fransiya va Birlashgan Arab Amirliklarining har biri bilan savdo aylanmasi 1,2 mlrd dollardan qayd etilgan.
Honkong (Xitoy maxsus ma’muriy hududi) bilan savdo aylanmasi 980,1 mln dollarni, Qirg‘iziston bilan esa 908,4 mln dollarni tashkil etgan.