O‘zbekistonliklar Turkiyadagi qurilish kompaniyasiga ishga taklif qilinmoqda
Migratsiya agentligi Turkiyadagi yirik qurilish kompaniyasi loyihalarida ishlash uchun 124 nafar xodimni tanlab olmoqda. Vakansiyalar orasida ekskavator operatori, santexnik, payvandchi va oddiy ishchi bor. Maosh lavozimga qarab 760 dollardan 1115 dollargacha. Arizalar 16-oktabrgacha qabul qilinadi.
O‘zbekistonliklar Turkiyadagi qurilish kompaniyasiga ishga taklif qilinmoqda
Migratsiya agentligi O‘zbekiston fuqarolarini Turkiyadagi yirik qurilish kompaniyasi loyihalarida ishlashga chorlamoqda.
Jami 124 ta bo‘sh ish o‘rni mavjud. Maosh lavozimga qarab oyiga 37,5 mingdan 55 ming turk lirasigacha (taxminan 760 dollardan 1115 dollargacha) belgilangan.
Ish kuni 10 soat, haftasiga olti kun davom etadi. Mehnat shartnomasi bir yilga tuziladi, keyinchalik uni ikki-uch yilgacha uzaytirish imkoniyati bor. Sinov muddati ikki oyni tashkil etadi. Belgilangan ish vaqtidan tashqari bajarilgan ish uchun qo‘shimcha haq to‘lanadi.
Nomzodlar 18 yoshdan 45 yoshgacha bo‘lgan erkaklar bo‘lishi kerak. Ular kamida umumiy o‘rta yoki o‘rta maxsus ma’lumotga, o‘z sohasida kamida ikki yillik ish tajribasiga va turk tilini o‘rta darajada bilish ko‘nikmasiga ega bo‘lishi lozim. Shuningdek, nomzodlar sog‘lom, mehnatkash va spirtli ichimlik iste’mol qilish kabi zararli odatlardan xoli bo‘lishi talab etiladi.
Ish beruvchi O‘zbekistondan Turkiyaga aviachipta, aeroportdan ish joyigacha va mahalliy transport (avtobus) xarajatlarini qoplaydi. Shuningdek, Turkiyada ishlash uchun ruxsatnoma rasmiylashtirish, yotoqxona, bepul ovqatlanish, tibbiy va davlat ijtimoiy sug‘urtasi (SGK), ish jarayonidagi baxtsiz hodisalardan sug‘urtalash hamda soliq to‘lovlari ish beruvchi hisobidan amalga oshiriladi.
Arizalar 2026-yil 16-oktabrga qadar qabul qilinadi.
Taqdim etilgan hujjatlar ish beruvchi tomonidan ko‘rib chiqiladi. Talablarga mos kelgan nomzodlar keyingi bosqich — suhbatga taklif etiladi.