O‘zbekistonlik ona va farzandi Vladivostokdan Vatanga qaytarildi
Rossiyaning Vladivostok shahrida og‘ir ijtimoiy ahvolda qolgan O‘zbekiston fuqarosi va uning voyaga yetmagan farzandi mamlakatimizning Bosh konsulxonasi hamda Migratsiya agentligi ko‘magida O‘zbekistonga qaytarildi.
O‘zbekiston fuqarosi bo‘lgan ona va uning farzandi Vladivostokdan O‘zbekistonga qaytarildi.
Xabarlarga ko‘ra, O‘zbekistonning Vladivostokdagi Bosh konsulxonasiga murojaat qilgan fuqaro vaqtinchalik yashash joyi va moddiy mablag‘i tugaganini ma’lum qilib, vatanga qaytishda amaliy yordam so‘ragan.
Shundan so‘ng, diplomatik vakolatxona Migratsiya agentligi bilan hamkorlikda zarur tashkiliy va konsullik choralarini ko‘rdi. Fuqaroning ijtimoiy ahvoli inobatga olinib, Migratsiya agentligi jamg‘armasi hisobidan ular uchun "Vladivostok – Toshkent" yo‘nalishi bo‘yicha aviachiptalar sotib olindi.
Barcha kerakli hujjatlar rasmiylashtirilib, kuzatuv ishlari yakunlangach, ona va farzandning Vladivostokdan jo‘nab ketishi tashkil etildi.
Natijada, fuqarolar sog‘-salomat O‘zbekistonga qaytarildi.