O‘zbekistonda rejali elektr uzilishlari haqida iste’molchilarni oldindan ogohlantirilish tizimi ishga tushishi mumkin

O‘zbekistonda rejali elektr uzilishlari haqida iste’molchilarni oldindan ogohlantirish tizimi yo‘lga qo‘yilishi mumkin

O‘zbekistonda elektr iste’molchilarini rejali uzilishlar haqida bir-ikki kun oldin xabardor qilish tizimini ishga tushirish rejalashtirilmoqda. Bu haqda “Hududiy elektr tarmoqlari” rahbari Sardor Iskulov ma’lum qildi.

Sardor Iskulovning aytishicha, elektr ta’minotidagi barcha uzilishlarni butunlay yo‘qotishning imkoni yo‘q. Chunki tarmoqlarda avariyaviy uzilishlar ham yuz berishi mumkin. Shu bilan birga, uskunalarni ta’mirlash va modernizatsiya qilish uchun rejali uzilishlar zarur.

“Agar rejali ravishda elektrni o‘chirib, ayrim tarmoqlarni modernizatsiya qilmasak, qishki mavsumdan muammolar bilan o‘tamiz”, — dedi korxona rahbari.

Uning tushuntirishicha, ta’mirlash vaqtida mutaxassislar izolyatorlarni almashtiradi, simlarni sozlaydi va boshqa texnik ishlarni bajaradi. Xodimlar xavfsizligini ta’minlash uchun esa ta’mirlanayotgan tarmoqni vaqtincha o‘chirish talab etiladi. Bir tarmoqqa o‘rtacha 15−20 ta transformator punkti ulangan bo‘lishi mumkin. Shu sababli ta’mirlash davomida mazkur punktlarda ham elektr ta’minoti uziladi.

Korxona rahbari ma’lum qilishicha, u lavozimga kelganidan keyingi taxminan ikki yarim oy davomida tarmoqlar faoliyatini raqamlashtirish strategiyasi ishlab chiqilgan. Texnik talablar tayyorlanib, Uzinfocom tomonidan dastlabki taqdimot o‘tkazilgan.

Raqamlashtirish tizimi bir nechta vazifani qamrab oladi. Jumladan, xodimlarning ish joyidagi faoliyati, ularga berilgan materiallarning maqsadli yetkazilishi va muayyan qurilmalarda bajarilayotgan ta’mirlash ishlarini nazorat qilish rejalashtirilgan.

Shuningdek, iste’molchilarga rejali uzilishlar haqida oldindan xabar berish mexanizmi joriy etilishi ko‘zda tutilmoqda.

Iskulovning misoliga ko‘ra, muayyan transformator punktida ta’mirlash ishlari rejalashtirilsa, unga ulangan iste’molchilarning telefon raqamlari orqali bir yoki ikki kun oldin Telegram botdan ogohlantirish yuboriladi. Xabarda elektr ta’minoti qaysi kuni va soat nechadan nechagcha uzilishi, shuningdek, keltirilgan noqulaylik uchun uzr so‘ralishi ko‘zda tutilgan.

Korxona rahbarining aytishicha, Uzinfocom ilovaning dastlabki variantini taqdim etgan. Unda iste’molchilar bilan ishlash, xodimlar faoliyatini nazorat qilish va koll-markaz funksiyalarini birlashtirish rejalashtirilgan.

Biroq tizimni ishlab chiqish bo‘yicha texnik talablarga qo‘shimcha o‘zgartirishlar kiritish tavsiya etilgan. Shu sababli navbatdagi taqdimot kelasi haftaga belgilangan.

“Hozircha aniq muddat aytilmagan. Ular taxminan ikki-uch oy vaqt so‘rayapti, chunki raqamlashtirish uchun ma’lumotlar bazasiga barcha ma’lumotlarni kiritishimiz kerak”, — dedi Iskulov.

Demak, hozircha Telegram orqali ogohlantirish tizimining ishga tushish sanasi belgilanmagan. Uning muddati keyingi taqdimotdan so‘ng aniqlashtirilishi kutilmoqda.

Matbuot anjumanida elektr uzilishlari nima uchun qishda ko‘proq norozilik keltirib chiqarishi haqida ham savol berildi.

Sardor Iskulov ta’mirlash ishlari yozda ham, qishda ham uzluksiz olib borilishini aytdi. Uning fikricha, sovuq ob-havo va kunlarning qisqarishi sababli iste’molchilar qishdagi uzilishlarni ko‘proq sezadi.

Korxona rahbari elektr ta’minotidagi uzilishlar soni va ularning davomiyligi xalqaro reyting ko‘rsatkichlarida ham aks etishini qayd etdi. Ushbu ma’lumotlar bilan het.uz platformasi orqali tanishish mumkinligini bildirdi.

Iskulovning ta’kidlashicha, rejali uzilishlar haqida oldindan xabar berish tizimi iste’molchilarga kunlik rejalarini shunga moslashtirish imkonini beradi. Bu esa elektr tarmoqlari korxonasi bilan iste’molchilar o‘rtasidagi munosabatlarni yaxshilashga xizmat qilishi kutilmoqda.