O‘zbekistonda investorlar uchun yer sotib olish tartibi soddalashtiriladi
Davlat ko‘chmas mulki xaridorlari uchun yerni rasmiylashtirish soddalashtiriladi: obyekt bilan bog‘liq yerga bo‘lgan huquq u xususiylashtirilguniga qadar, ijarani qayta rasmiylashtirmasdan saqlanib qoladi. Auksiondagi yerlar “tayyor paket” tamoyili asosida tayyorlanadi.
O‘zbekistonda investorlar uchun yer xarid qilish tartibi yengillashtiriladi
O‘zbekistonda yer uchastkalarini auksionga chiqarishga tayyorlashning yangi mexanizmi joriy etilmoqda. Bu prezidentning 28-avgustdagi iqtisodiyotda davlat ishtirokini qisqartirish va xususiylashtirishni jadallashtirish to‘g‘risidagi farmonida nazarda tutilgan.
Hujjatga muvofiq, mahalliy arxitektura-shaharsozlik kengashlari taklif qiladigan uchastkalar “tayyor paket” tamoyili asosida — muhandislik tarmoqlariga ulanish bo‘yicha oldindan tayyorlangan texnik shartlar va qurilishga ruxsatnoma hujjatlari bilan birga shakllantirilishi rejalashtirilgan.
Bunday paketni tayyorlash xarajatlari mahalliy budjetlar hisobidan qoplanishi mumkin. Keyinchalik bu xarajatlar yer uchastkasi auksionga qo‘yilganda uning boshlang‘ich narxiga qo‘shiladi.
Shuningdek, uchastkalarni sotish rejalashtirilayotgan hududlar uchun master-planlarni oldindan ishlab chiqish va tasdiqlash ham ko‘zda tutilgan. Investorlarga sotish uchun muayyan yer uchastkalari aynan shu master-planlar asosida shakllantiriladi.
Farmon davlat ko‘chmas mulkini xususiylashtirishda yerni rasmiylashtirish tartibini ham o‘zgartiradi.
Agar xaridor davlat obyektini sotib olsa, u bilan bog‘liq yer uchastkasiga bo‘lgan huquq yerning o‘zi xususiylashtirilguniga qadar unda saqlanib qoladi. Bunda ushbu uchastkaga bo‘lgan ijara huquqini qayta rasmiylashtirish talab qilinmaydi.
Uch oydan ortiq vaqt davomida savdolarda sotilmagan qishloq xo‘jaligiga mo‘ljallanmagan bo‘sh turgan yer uchastkalari uchun alohida mexanizm nazarda tutilgan.
Bunday holatlarda, e’lon qilingan loyiha amalga oshirilishi sharti bilan, uchastkaga bo‘lgan huquq investor ishtirokida tashkil etilayotgan xo‘jalik jamiyatining ustav kapitaliga kiritilishi mumkin.
Keyinchalik ushbu kompaniyadagi davlat ulushi aynan shu investorga sotib olish uchun taklif etilishi mumkin.
Investitsiya va ijtimoiy majburiyatlarini to‘liq bajargan Toshkent sanoat zonalari ishtirokchilariga o‘zlari egallab turgan yer uchastkalarini, shuningdek, ularda joylashgan bino va inshootlarni belgilangan tartibda xususiylashtirishga ruxsat beriladi.
Davlat banklariga ham sotuvga qo‘yilayotgan davlat aktivlari va yer uchastkalarini tadbirkorlik loyihalariga faolroq jalb etish topshirildi.
Buning uchun “loyihalar fabrikasi” yondashuvi qo‘llanadi — banklar potensial investorlar uchun ushbu aktivlar bo‘yicha biznes-takliflarni tayyorlash va ilgari surishga ko‘maklashishi kerak.
Yangi mexanizmlar kengaytirilgan xususiylashtirish dasturiga kiritilgan bo‘lib, uning doirasida hukumat tadbirkorlik va shaharsozlik maqsadlari uchun 8000 gektarga yaqin yer uchastkalarini savdoga chiqarishni rejalashtirmoqda.