O‘zbekiston yoshlar terma jamoasi Suriyani yirik hisobda mag‘lub etib, U-20 Osiyo Kubogi yo‘llanmasini qo‘lga kiritdi
O‘zbekiston yoshlar terma jamoasi Suriyani yirik hisobda taslim etib, U-20 Osiyo Kubogiga yo‘llanma oldi
2027-yilda Xitoyda bo‘lib o‘tadigan yoshlar (U-20) o‘rtasidagi Osiyo Kubogi uchun saralash bosqichida O‘zbekiston terma jamoasi navbatdagi o‘yinini o‘tkazdi.
B guruhidagi keyingi uchrashuvda Jamoliddin Rahmatullayev boshqaruvidagi O‘zbekiston yoshlari Suriya terma jamoasiga qarshi maydonga tushib, 3:0 hisobida ishonchli g‘alabaga erishdi.
Bellashuvning 10-daqiqasidayoq Diyor Ermanov hisobni ochib, jamoasini oldinga olib chiqdi. Asosiy vaqt yakuniga yaqin, aniqrog‘i 81-daqiqada Quvonchbek Abrayev ustunlikni ikkitaga yetkazdi. Hakam tomonidan qo‘shib berilgan 90+4-daqiqada esa Davron To‘laganov penaltini aniq amalga oshirib, yakuniy natijani belgiladi.
Mazkur g‘alaba evaziga Jamoliddin Rahmatullayev shogirdlari 9 ochko jamg‘arib, guruhda 1-o‘rinni egalladi va Osiyo Kubogining asosiy bosqichiga yo‘llanmani qo‘lga kiritdi.
Shuningdek, guruhda 6 ochko to‘plagan Hindiston yoshlar terma jamoasi ham 2-o‘rin bilan Xitoyda o‘tadigan Osiyo Kubogiga yo‘l oldi. Suriya (3 ochko) va Bangladesh (0 ochko) esa saralashdagi ishtirokini yakunladi.
Turnir 2027-yil 24-martdan 10-aprelga qadar Xitoyda o‘tkaziladi. Osiyo Kubogida yarim finalga chiqqan jamoalar (kuchli to‘rtlik) esa 2027-yilgi FIFA U-20 Jahon chempionatida qatnashish huquqini qo‘lga kiritadi. Ahamiyatlisi, Ozarbayjon va O‘zbekiston hamkorligida o‘tkaziladigan ushbu kichik mundialga O‘zbekiston yoshlar terma jamoasi mezbon sifatida avtomatik tarzda yo‘llanma olgan.
U-20 Osiyo Kubogi-2027. Saralash turniri
O‘zbekiston — Suriya 3:0
Gollar: 1:0 — Diyor Ermanov (10), 2:0 — Quvonchbek Abrayev (81), 3:0 — Davron To‘laganov (90+4, penalti).