O‘zbekiston va Xitoy qurilish sohasidagi loyihalarni muhokama qildi

**O‘zbekiston va Xitoy qurilish yo‘nalishidagi loyihalarni muhokama qildi**

O‘zbekistonda qurilish hamda uy-joy kommunal xo‘jaligi sohalarida Xitoy kompaniyalari bilan hamkorlik istiqbollari ko‘rib chiqildi. Uchrashuvda issiqlik taʼminotini modernizatsiya qilish va investitsiya loyihalarini amalga oshirish masalalariga ham alohida eʼtibor berildi.

Qurilish va uy-joy kommunal xo‘jaligi vazirligida China Railway Prefabricated Xinjiang Construction Development Co., Ltd. va Hengkang Technology Kenya Co., Ltd. kompaniyalari delegatsiyasi bilan uchrashuv bo‘lib o‘tdi.

Muzokaralar chog‘ida tomonlar o‘zaro manfaatli hamkorlikni kengaytirish, zamonaviy texnologiyalarni tatbiq etish hamda qurilish va kommunal sohalarda istiqbolli loyihalarni amalga oshirish imkoniyatlarini muhokama qildi.

Yig‘ma va industrial qurilish yechimlaridan keng foydalanishga alohida urg‘u berildi. Shuningdek, ekologik toza qurilish materiallaridan foydalanish, po‘lat konstruksiyalar ishlab chiqarish va EPC shartlari asosida kompleks loyihalarni amalga oshirish masalalari ham ko‘rib chiqildi.

Bundan tashqari, tomonlar qurilish va kommunal infratuzilma sohalarida EPC+F shartlari hamda davlat-xususiy sheriklik asosida loyihalarni amalga oshirish istiqbollarini muhokama qildi.

Muzokaralarning alohida yo‘nalishi O‘zbekistonda issiqlik taʼminoti tizimlarini modernizatsiya qilish bo‘ldi. Tomonlar kogeneratsiya stansiyalari va zamonaviy issiqlik markazlarini qurish, shuningdek, geotermal issiqlik nasoslari texnologiyalarini joriy etish masalalarini muhokama qildi.

Muhokamalar yakunida issiqlik taʼminoti sohasidagi istiqbolli loyihalar haqida maʼlumot almashish bo‘yicha kelishuvga erishildi. Xitoy kompaniyalari taklif etilgan loyihalarni o‘rganib, ularni moliyalashtirish va hamkorlik qilishning ehtimoliy shartlari bo‘yicha takliflar tayyorlaydi.

Uchrashuv ishtirokchilari yig‘ma qurilish sohasida qo‘llaniladigan Xitoy standartlari va texnik talablarni o‘rganish masalalarini ham ko‘rib chiqdi.

Tomonlar qurilish jarayonlari samaradorligini oshirish va ularning atrof-muhitga taʼsirini kamaytirish uchun ilg‘or texnologiyalarni joriy etish muhimligini taʼkidladi.

Uchrashuv yakuniga ko‘ra, tomonlar ishchi tartibda muzokaralarni davom ettirish hamda loyiha va texnik hujjatlar bilan almashishga kelishib oldi.

Shuningdek, qurilish, uy-joy kommunal infratuzilmasi va issiqlik taʼminoti sohalarida aniq loyihalarni amalga oshirish uchun samarali hamkorlik mexanizmlarini ishlab chiqish rejalashtirilmoqda.