O‘zbekiston va Xitoy oftalmologiya sohasida hamkorlikni kengaytirmoqda
O‘zbekiston va Xitoy oftalmologiya sohasida tajriba almashish va qo‘shma operatsiyalarni kengaytirmoqda. 150 nafar bemorga yordam ko‘rsatiladi.
O‘zbekiston va Xitoy oftalmologiya sohasidagi hamkorlikni kengaytirmoqda, bu esa mutaxassislar o‘rtasida tajriba almashish va birgalikda jarrohlik amaliyotlarini o‘tkazishga zamin yaratmoqda. Bu haqda O‘zbekiston Sog‘liqni saqlash vazirligi matbuot xizmati xabar berdi.
2019-yildan boshlab, "Bir makon, bir yo‘l" dasturi doirasida Xitoy shifoxonalari va kompaniyalari bilan hamkorlikda O‘zbekistonda ijtimoiy himoyaga muhtoj bo‘lgan 4 mingdan ortiq katarakta bilan kasallangan fuqaroga jarrohlik yordami ko‘rsatildi.
Hozirda "Nur va ezgulik ulash" aksiyasi oltinchi marotaba o‘tkazilmoqda. Uning ochilish marosimi Respublika ixtisoslashtirilgan ko‘z mikroxirurgiyasi ilmiy-amaliy tibbiyot markazida bo‘lib o‘tdi.
Ushbu aksiya doirasida 150 nafar bemorning ko‘rish qobiliyatini tiklash rejalashtirilgan. Tadbir ikki davlat o‘rtasida rivojlanib borayotgan tibbiy hamkorlik doirasida Xitoy tomoni ishtirokida amalga oshirilmoqda.
Marosim davomida O‘zbekiston sog‘liqni saqlash vaziri maslahatchisi Elmira Basitxanova Xitoyning "Asia-Europe International Materials Trading Center" kompaniyasi rahbari Chjan Syunpinga "O‘zbekiston Respublikasi sog‘liqni saqlash aʼlochisi" ko‘krak nishonini topshirdi.
O‘zbekistonlik va xitoylik oftalmologlar o‘rtasidagi hamkorlik zamonaviy diagnostika va davolash usullari bo‘yicha muntazam tajriba almashishni, shuningdek, qo‘shma jarrohlik amaliyotlarini o‘tkazishni o‘z ichiga oladi.
O‘zbekiston Sog‘liqni saqlash vazirligi matbuot xizmati aksiyaning o‘tkazilishi haqidagi videolavhani yaqin vaqt ichida taqdim etishini maʼlum qildi.