O‘zbekiston va Ozarbayjon yangi loyihalarni muhokama qildi
O‘zbekiston va Ozarbayjon Toshkentda siyosiy maslahatlashuv o‘tkazib, savdo, investitsiya, energetika va yangi qo‘shma loyihalarni muhokama qildi.
O‘zbekiston va Ozarbayjon yangi loyihalarni muhokama qildi
Toshkentda 19-avgust kuni O‘zbekiston va Ozarbayjon Tashqi ishlar vazirliklari o‘rtasida siyosiy maslahatlashuvlarning navbatdagi bosqichi bo‘lib o‘tdi. Muzokaralarga O‘zbekiston tashqi ishlar vaziri o‘rinbosari Bobur Usmonov va Ozarbayjon tashqi ishlar vaziri o‘rinbosari Samir Sharifov rahbarlik qildi. Bu haqda O‘zbekiston Respublikasi Tashqi ishlar vazirligi ma’lum qildi.
Uchrashuvda tomonlar O‘zbekiston-Ozarbayjon munosabatlarining hozirgi holati va ularni strategik sheriklik hamda ittifoqchilik doirasida rivojlantirish istiqbollarini muhokama qildilar. Siyosiy muloqotni mustahkamlash va ikki mamlakat o‘rtasidagi hamkorlikni kengaytirishga alohida e’tibor qaratildi.
Muzokaralar kun tartibidan oliy darajadagi bo‘lajak tadbirlarga tayyorgarlik masalasi ham o‘rin oldi. Shuningdek, ikki mamlakat vakillari savdo-iqtisodiy va investitsiyaviy hamkorlikni rivojlantirish masalalarini ko‘rib chiqdilar.
Ustuvor yo‘nalishlar sifatida transport va logistika, energetika, shuningdek, madaniy-gumanitar hamkorlik belgilandi.
Tomonlar amaliy hamkorlikni sifat jihatidan yangi bosqichga olib chiqish zarurligini ta’kidladilar. Xususan, yangi qo‘shma sanoat loyihalarini ilgari surish va ikki tomonlama savdoni yanada oshirish uchun mavjud salohiyatdan to‘liqroq foydalanish masalalari muhokama qilindi.
Muzokaralar ishtirokchilari sog‘liqni saqlash va madaniyat sohalarida hamkorlikni faollashtirish istiqbollarini ham alohida qayd etdilar.
Bundan tashqari, O‘zbekiston va Ozarbayjon vakillari o‘zaro manfaatli bo‘lgan mintaqaviy va xalqaro kun tartibidagi dolzarb masalalar yuzasidan fikr almashdilar.