O‘zbekiston va O‘mon preferensial savdo to‘g‘risidagi bitimni tayyorlashga kelishdi
O‘zbekiston va O‘mon preferensial savdo hamda investitsiyalarni himoya qilish to‘g‘risidagi bitimlarni tayyorlash bo‘yicha kelishuvlarga erishdi. Tomonlar transport-logistika yo‘laklari va qo‘shma loyihalarni ham muhokama qildi.
O‘zbekiston va O‘mon preferensial savdo to‘g‘risidagi bitimni tayyorlashga kelishdi
O‘zbekiston va O‘mon preferensial savdo hamda investitsiyalarni himoya qilish bo‘yicha bitimlarni tayyorlash yuzasidan kelishuvga erishdi. Bu masala O‘zbekiston investitsiyalar, sanoat va savdo vaziri Laziz Kudratovning 30-sentabr — 2-oktabr kunlari Maskat shahriga qilgan amaliy tashrifi doirasida muhokama qilindi.
Vazir O‘mon davlat tuzilmalari va kompaniyalari rahbarlari bilan uchrashuvlar o‘tkazdi. Iqtisodiyot vaziri Xamis bin Sayf al-Jabriy hamda savdo, sanoat va investitsiyalarni rag‘batlantirish vaziri Anvar bin Hilol al-Jabriy bilan bo‘lgan muzokaralarda savdo va investitsiyalar, sanoat kooperatsiyasi, transport-logistika yo‘laklari hamda ikki tomonlama kun tartibidagi boshqa masalalar ko‘rib chiqildi.
Tomonlar, shuningdek, investitsiyalarni himoya qilish va preferensial savdo bo‘yicha bitimlarni tayyorlash, transport yo‘laklari hamda qo‘shma loyihalar yuzasidan ham kelishuvlarga erishgan.
Bunday kelishuv ayrim tovar guruhlariga bojlarni kamaytirish yoki bekor qilishni nazarda tutishi va shu orqali o‘zaro savdoni soddalashtirishi mumkin. Hozircha aynan qaysi tovarlarga imtiyozlar berilishi ma’lum qilinmagan.
O‘mon ishbilarmon doiralari bilan muloqotlarda logistika, energetika, neft-gaz kimyosi, elektrotexnika, tog‘-kon sanoati, bank sektori va turizm sohalaridagi hamkorlik istiqbollari muhokama qilindi.
Uchrashuvlarda yangi ishlab chiqarish va logistika quvvatlarini yaratish, eksport yo‘nalishlarini kengaytirish, energiyani saqlash tizimlari va ma’lumotlar markazlarini tashkil etish, xomashyoni qayta ishlash hamda to‘g‘ridan-to‘g‘ri yetkazib berish masalalari ham ko‘rib chiqildi.
Bundan tashqari, biznes-forum, O‘zbekiston salohiyati ko‘rgazmasi va yirik biznes vakillari bilan uchrashuvlar o‘tkazish masalalari ishlab chiqilmoqda.
Eslatib o‘tamiz, avgust oyida O‘zbekiston Janubiy Afrika Respublikasi bilan ham preferensial savdo to‘g‘risidagi bitim ustida ish boshlashga kelishib olgandi.