O‘zbekiston va Mordoviya sanoat kooperatsiyasini kengaytiradi
O‘zbekiston va Mordoviya farmatsevtika, elektrotexnika, metallurgiya va boshqa sohalarda qo‘shma loyihalarni kengaytirishni muhokama qildi.
O‘zbekiston va Mordoviya sanoat sohasidagi hamkorlikni kengaytirishga kelishib oldilar.
O‘zbekiston investitsiyalar, sanoat va savdo vaziri Laziz Qudratov 20-avgust kuni Mordoviya Respublikasi rahbari Artyom Zdunov bilan uchrashdi. Muloqot chog‘ida tomonlar savdo-iqtisodiy aloqalarni mustahkamlash, sanoat kooperatsiyasini rivojlantirish va hududlararo to‘g‘ridan-to‘g‘ri hamkorlikni kengaytirish masalalarini muhokama qildilar.
Uchrashuvda farmatsevtika, elektrotexnika, metallurgiya, qishloq xo‘jaligi, yog‘ochni qayta ishlash va axborot texnologiyalari kabi sohalarda qo‘shma loyihalarni amalga oshirishga alohida e’tibor qaratildi.
Shuningdek, Buxoro, Navoiy va Jizzax viloyatlaridagi sanoat parklari hududlarida yangi ishlab chiqarish quvvatlarini joylashtirish imkoniyatlari ko‘rib chiqildi. O‘zbekiston va Mordoviya korxonalari o‘rtasida to‘g‘ridan-to‘g‘ri aloqalarni kengaytirish masalasi ham atroflicha muhokama qilindi.
Uchrashuv yakunida aniq kooperatsiya va investitsiya tashabbuslari ustidagi ishlarni faollashtirish bo‘yicha kelishuvga erishildi. Ushbu tashabbuslarni amalga oshirish maqsadida ikki tomonning tegishli tuzilmalari va ishbilarmon doiralari vakillari hamkorlikni davom ettiradilar.