O‘zbekiston TIV Ukrainani Mustaqillik kuni bilan tabrikladi
O‘zbekiston Tashqi ishlar vazirligi Ukrainani Mustaqillik kuni bilan tabrikladi. 'Ukrainadagi barcha do‘stlarimizni Mustaqillik kuni bilan samimiy tabriklaymiz!' — deyiladi vazirlikning X’dagi sahifasida.
O‘zbekiston Tashqi ishlar vazirligi Ukrainani Mustaqillik kuni bilan qutladi. Bu haqda vazirlikning X (ilgari Twitter nomi bilan tanilgan) ijtimoiy tarmog‘idagi rasmiy sahifasida e’lon qilindi.
Tabrik postida shunday deyilgan: “Ukrainadagi barcha do‘stlarimizni Mustaqillik kuni bilan samimiy tabriklaymiz!”
Ukraina 24-avgust kuni o‘z mustaqilligining 35 yilligini nishonlamoqda. 1991-yilning aynan shu sanasida Ukraina Oliy radasi mamlakat mustaqilligi to‘g‘risidagi aktni qabul qilgan edi. Ushbu qaror o‘sha yilning 1-dekabrida o‘tkazilgan umumxalq referendumida aholining 90 foizdan ortig‘i tomonidan qo‘llab-quvvatlangan.
O‘zbekiston va Ukraina o‘rtasida diplomatik aloqalar 1992-yilda o‘rnatilgan.
2022-yilda munosabatlarning 30 yilligi nishonlanganida, Shavkat Mirziyoyev Vladimir Zelenskiyga yo‘llagan tabrigida quyidagilarni ta’kidlagan edi: “Bu oyda biz ikki tomonlama munosabatlarimiz tarixidagi muhim sana – diplomatik munosabatlar o‘rnatilganining 30 yilligini nishonlaymiz. Hech shubha yo‘qki, an’anaviy do‘stlik va o‘zaro hurmat tamoyillariga asoslangan o‘zbek-ukrain munosabatlari birgalikdagi sa’y-harakatlarimiz tufayli bundan keyin ham rivojlanib boradi”.
Rossiyaning Ukrainaga keng ko‘lamli bosqini boshlanganidan so‘ng, 2022-yil mart oyida tashqi ishlar vaziri Abdulaziz Komilov O‘zbekiston Ukrainaning mustaqilligi, suvereniteti va hududiy yaxlitligini tan olishini, biroq Donetsk va Lugansk respublikalarini tan olmasligini rasman ma’lum qilgan edi.