O‘zbekiston terma jamoasi IOI 2026da to‘rt medal oldi
O‘zbekiston terma jamoasi Toshkentda o‘tkazilgan IOI 2026 informatika olimpiadasida bir kumush va uch bronza medalni qo‘lga kiritdi.
O‘zbekiston terma jamoasi IOI 2026da to‘rt medalni qo‘lga kiritdi
Toshkentda bo‘lib o‘tgan 38-xalqaro informatika olimpiadasi (IOI 2026) yakunlariga ko‘ra, O‘zbekiston terma jamoasi to‘rtta medal bilan qaytdi.
Milliy terma jamoa tarixida ilk bor barcha to‘rt nafar ishtirokchi sovrindor bo‘lishga muvaffaq bo‘ldi. Ular jami bitta kumush va uchta bronza medalni qo‘lga kiritdilar.
Kumush medal Muhammad al-Xorazmiy nomidagi maktabning 9-sinf o‘quvchisi Johanali Haydaraliyevga nasib etdi.
Bronza medallar esa quyidagi o‘quvchilarga topshirildi: Nukus shahridagi Prezident maktabining 11-sinf o‘quvchisi Timur Qodirbergenov, Namangan shahridagi Prezident maktabining 11-sinf o‘quvchisi Ulug‘bek Rahmatullayev va shu maktabning 10-sinf o‘quvchisi Jahongirshoh Avazxonov.
Shuningdek, Navoiy shahridagi Prezident maktabi o‘quvchisi Sardorbek Salimov "Faxriy eʼtirof" mukofoti bilan taqdirlandi.
Bu tarixiy natija o‘quvchilarning ko‘p yillik mashaqqatli tayyorgarligi, ularning ustozlari mehnati hamda mamlakatda iqtidorli yoshlarni qo‘llab-quvvatlashga qaratilgan raqamli taʼlim sohasidagi islohotlarning samarasi hisoblanadi.
O‘zbekistonlik o‘quvchilarning Toshkentda o‘tkazilgan ushbu xalqaro olimpiadadagi muvaffaqiyatli ishtiroki informatika bo‘yicha milliy terma jamoaning eng muhim yutuqlaridan biri bo‘lib, mamlakat yosh dasturchilarining kelajakdagi xalqaro musobaqalardagi ishtiroki uchun mustahkam zamin yaratdi.