O‘zbekiston Qirg‘iziston asalining eng yirik xaridori bo‘ldi

Qirg‘iziston 2026-yilning dastlabki olti oyida tabiiy asal eksportidan 660 ming dollardan ziyod daromad topdi, bunda O‘zbekiston ushbu mahsulotning eng yirik xaridori bo‘ldi. Bu haqda 24.kg nashri Milliy statistika qo‘mitasi ma’lumotlariga tayanib xabar berdi.

Yanvar-iyun oylarida mamlakat asal savdosidan 661,6 ming dollar sof foyda ko‘rgan. Bu davrda jami 189,1 tonna asal xorijga jo‘natilgan. Qirg‘iz asalining asosiy xaridorlari quyidagilar:

* O‘zbekiston — 103,3 tonna (88,2 ming dollarlik);

* Yaponiya — 21,1 tonna (205,2 ming dollarlik);

* Xitoy — 35,9 tonna (195,7 ming dollarlik);

* Birlashgan Arab Amirliklari — 9,4 tonna (41,5 ming dollarlik);

* Qatar — 6,5 tonna (28,6 ming dollarlik).

Shu bilan birga, Qirg‘izistonning o‘zi 2026-yilning birinchi yarmida xorijdan atigi 1,2 ming dollarlik asal sotib olgan. Bu mahsulot Yangi Zelandiya (1,1 ming dollar) va Rossiyadan (0,1 ming dollar) keltirilgan.

Eslatib o‘tamiz, 2023-yilda Qirg‘iziston asalini Toshkentga yetkazib berish bo‘yicha dastlabki shartnoma imzolangan edi. O‘zbekistondan tashqari, Qirg‘iziston o‘z asalini dunyoning yana 25 davlatiga sotadi. Hozirda Qirg‘izistondan Xitoy, BAA, Saudiya Arabistoni va Rossiyaga asal eksport qilinmoqda.