O‘zbekiston Kubogi. “Navbahor” “Nasaf”ni musobaqadan chiqarib yubordi
O‘zbekiston Kubogi: "Navbahor" "Nasaf"ni musobaqadan chiqarib yubordi
Futbol bo‘yicha O‘zbekiston Kubogining 1/8 final bosqichida yana ikkita o‘yin bo‘lib o‘tdi.
**"So‘g‘diyona" — "Jayxun"**
Kunning birinchi o‘yini Jizzaxda bo‘lib o‘tdi. Unda mezbon "So‘g‘diyona" jamoasi Qoraqalpog‘istonning "Jayxun" klubi bilan kuch sinashdi.
Birinchi bo‘limning 33-daqiqasida mezbonlar himoyachisi Filip Ivanovich hisobni ochdi. O‘yinning 89-daqiqasiga kelib, Abdulazizxon Abdurashidov hisobni ikkitaga oshirdi. Bu hisob o‘yin yakuniga qadar o‘zgarmadi va jizzaxliklar 2:0 hisobida ishonchli g‘alabani qo‘lga kiritdi.
Ushbu g‘alabadan so‘ng "So‘g‘diyona" turnirning chorak finaliga yo‘l oldi. "Jayxun" esa musobaqa bilan xayrlashdi.
**O‘zbekiston Kubogi, 1/8 final**
**"So‘g‘diyona" — "Jayxun" 2:0**
**Gollar**: 1:0 — Ivanovich (33), 2:0 — Abdurashidov (89).
**"Navbahor" — "Nasaf"**
1/8 final bosqichining yana bir uchrashuvi Namangandagi "Markaziy" stadionida bo‘lib o‘tdi. Unda mezbon "Navbahor" jamoasi Qarshining "Nasaf" klubini qabul qildi.
Uchrashuvning asosiy vaqti keskin kurashlar ostida o‘tib, darvozalar daxlsizligi saqlanib qoldi. Hakam tomonidan qo‘shib berilgan 90+2-daqiqada esa "Navbahor" vakili Ruslanbek Jiyanov yakuniy nuqtani qo‘yib, mezbonlarning 1:0 hisobidagi g‘alabasini ta’minladi.
Ushbu qimmatli g‘alabadan so‘ng "Navbahor" ham O‘zbekiston Kubogining chorak finaliga chiqdi. "Nasaf" esa kubokdagi ishtirokini yakunladi.
**O‘zbekiston Kubogi, 1/8 final**
**"Navbahor" — "Nasaf" 1:0**
**Gol**: 1:0 — Jiyanov (90+2).