O‘zbekiston haydovchilik guvohnomalari Germaniyada tan olinishi mumkin
Shuningdek, avtobus va yuk avtomobili haydovchilarini Germaniya ish beruvchilari talablari asosida tayyorlaydigan qo‘shma haydovchilik maktabini
O‘zbekistonda berilgan haydovchilik guvohnomalarining Germaniyada bevosita tan olinishi ehtimoli ko‘rib chiqilmoqda. Bu masala Migratsiya agentligi rahbari o‘rinbosari Elyor Toshtemirovning Germaniyaning «Global Talent Alliance» va «TSK Logistik» kompaniyalari vakillari bilan bo‘lib o‘tgan uchrashuvida muhokama qilindi.
Suhbat davomida o‘zbekistonlik fuqarolarni Germaniyaning transport-logistika sohasida ish bilan ta’minlash, ularni mahalliy talablar asosida tayyorlash hamda viza rasmiylashtirishdagi muammolarni bartaraf etish masalalari ko‘rib chiqildi.
Bundan tashqari, avtobus va yuk avtomobili haydovchilarini Germaniya ish beruvchilari talablariga mos ravishda tayyorlaydigan qo‘shma haydovchilik maktabini tashkil etish taklifi bildirildi.
Uchrashuv yakunida Migratsiya agentligi va «Global Talent Alliance» o‘rtasida hamkorlik shartnomasi imzolandi.
Agentlik qo‘shma haydovchilik maktabini tashkil etish tashabbusini qo‘llab-quvvatlashga tayyor ekanini ma’lum qildi.
Haydovchilik guvohnomalarini o‘zaro tan olish masalasi hozircha taklif darajasida qolmoqda va bu borada yakuniy kelishuvga erishilmagan.