O‘zbekiston go‘sht importini oshirdi. Bozorlarda narx-navo qanday?

O‘zbekiston go‘sht importini ko‘paytirdi. Bozorlarda narxlar qanday?

Ijtimoiy tarmoqlarda xorijdan go‘sht olib kirish to‘xtagani va bozorlarda go‘sht narxlari oshib ketgani haqida xabarlar tarqalmoqda. Bojxona qo‘mitasi esa import borasida hech qanday uzilish yo‘qligini ma’lum qildi.

Bozor rastalarida mol va qo‘y go‘shti bilan bir qatorda xorijdan keltirilgan go‘sht mahsulotlari ham sotilmoqda. Mol go‘shti 110–170 ming so‘m, qo‘y go‘shti esa 130–170 ming so‘m atrofida baholanmoqda.

“Chorsu” bozorida Qozog‘iston va Pokistondan olib kelingan go‘sht mahsulotlarini ham uchratish mumkin. Ular 65–90 ming so‘m atrofida sotilmoqda. Sotuvchilarning aytishicha, import qilingan go‘shtga xaridorlar ko‘p.

Sotuvchilardan birining so‘zlariga ko‘ra, chetdan olib kirilayotgan go‘sht yetkazib berilishida ba’zan uzilishlar kuzatiladi. Biroq mahsulot kelishi butunlay to‘xtagan emas.

Bojxona qo‘mitasining “Daryo”ga bildirishicha, go‘sht mahsulotlarini bojxona nazoratidan o‘tkazish va rasmiylashtirish jarayonida hech qanday uzilish yoki muammo yo‘q. O‘zbekistonga 2025-yilda 870 million dollarlik go‘sht mahsulotlari import qilingan.

2026-yilning yanvar–avgust oylarida esa import hajmi 678 million dollarni tashkil etgan. Joriy yilda mamlakatga 29 ta davlatdan go‘sht olib kirilmoqda. Import qilingan mahsulotlarning 519 million dollari qoramol go‘shtiga, 54,6 million dollari tovuq go‘shtiga va 47,8 million dollari qo‘y go‘shtiga to‘g‘ri kelgan.

Shuningdek, 2026-yilning yanvar–avgust oylarida go‘sht importi o‘tgan yilning shu davriga nisbatan 173 million dollarga oshgan. Bu mamlakatga go‘sht importi hajmi sezilarli darajada ko‘payganini ko‘rsatadi.