O‘zbekiston BMTning mediatsiya bo‘yicha konvensiyasiga qo‘shildi
O‘zbekiston Birlashgan Millatlar Tashkilotining mediatsiya natijasida erishilgan xalqaro kelishuv bitimlari to‘g‘risidagi konvensiyasiga qo‘shildi. Bu bo‘yicha qonun 2026-yil 14-avgustda prezident Shavkat Mirziyoyev tomonidan imzolandi.
O‘zbekiston BMTning mediatsiya bo‘yicha konvensiyasiga a’zo bo‘ldi.
O‘RQ–1167-sonli qonunga asosan, O‘zbekiston Birlashgan Millatlar Tashkilotining mediatsiya natijasida erishilgan xalqaro kelishuv bitimlari to‘g‘risidagi konvensiyasiga qo‘shilishi tasdiqlandi. Ushbu konvensiya 2018-yil 20-dekabrda Nyu-York shahrida qabul qilingan edi.
Qonunga ko‘ra, O‘zbekiston konvensiyaga qo‘shilishda ikki muhim shartni belgiladi:
1. Konvensiya qoidalari O‘zbekiston Respublikasi yoki uning hukumat muassasasi, shuningdek, hukumat muassasasi nomidan ish yurituvchi shaxs ishtirok etgan kelishuv bitimlariga tatbiq etilmaydi.
2. O‘zbekiston konvensiyani faqat kelishuv bitimining ishtirokchilari uni qo‘llashga rozi bo‘lgan holatlarda tatbiq etadi.
Mazkur qonun 2026-yil 4-avgustda Qonunchilik palatasi tomonidan qabul qilinib, 8-avgustda Senat tomonidan ma’qullangan. Hujjat 14-avgust kuni Prezident tomonidan imzolangan.