OTMga qabul qilinmagan abituriyentlar uchun 6-yo‘nalishni tanlash boshlandi

OTMga qabul qilinmagan abituriyentlar uchun 6-yo‘nalishni tanlash imkoniyati yaratildi.

O‘zbekistonda joriy o‘quv yilida davlat oliygohlariga qabul qilinmagan abituriyentlarga 6-yo‘nalishni tanlash imkoniyati berilishi haqida avval xabar berilgan edi. Bugun, 22-avgustdan boshlab, 32 mingdan ortiq bo‘sh o‘rinlar uchun oltinchi yo‘nalishni tanlash jarayoni boshlandi.

Oliy ta’lim tashkilotlarining bakalavriat ta’lim yo‘nalishlariga kirish imtihonlarida ishtirok etib, belgilangan minimal 56,7 ball va undan yuqori ball to‘plagan, biroq talabalikka tavsiya etilmagan abituriyentlarga, shuningdek, ro‘yxatdan o‘tishning ikkinchi bosqichida oliy ta’lim tashkiloti va bakalavriat ta’lim yo‘nalishlarini tanlamagan abituriyentlarga vakant o‘rinlar mavjud bo‘lgan, fanlar majmuasi va ta’lim tili mos bakalavriat ta’lim yo‘nalishlari bo‘yicha qo‘shimcha tanlovda ishtirok etish imkoniyati taqdim etildi.

2026/2027-o‘quv yilida jami 80 ta oliy ta’lim muassasasida 31 ming 808 ta bo‘sh o‘rin mavjud bo‘lib, ushbu o‘rinlarni to‘ldirish maqsadida abituriyentlar o‘rtasida qo‘shimcha tanlov o‘tkaziladi.

2026-yil 22-avgustdan 28-avgustga qadar (shu kuni ham) Bilimni baholash agentligining “my.uzbmb.uz” rasmiy platformasi orqali mazkur toifadagi abituriyentlar qo‘shimcha tanlovda ishtirok etish uchun ro‘yxatdan o‘tishlari mumkin.

Abituriyentlarga fanlar majmuasi va ta’lim tili mos bo‘lgan, bo‘sh o‘rinlar mavjud bakalavriat ta’lim yo‘nalishlarini tanlash huquqi beriladi.

Ro‘yxatdan o‘tgan abituriyentlar bo‘sh o‘rinlarga to‘plagan ballari ketma-ketligiga qat’iy rioya qilingan holda, bazaviy to‘lov-kontrakt asosida talabalikka tavsiya qilinadi.

Tanlov yakunlari bo‘yicha Bilim va malakalarni baholash agentligi tomonidan tegishli tanlov qaydnomalari shakllantirilib, oliy ta’lim tashkilotlariga taqdim etiladi.