OTMga kirishda 234 ming abituriyent qoniqarsiz ball to‘pladi
O‘qishga kirish uchun kamida 56,7 ball (maksimal ballning 30 foizi) to‘plash talab etiladi. Bu yil jami abituriyentlarning 37,5 foizi ana shu minimum ballni ham to‘play olmadi. Ammo bu ko‘rsatkich yildan yilga pasaymoqda, avvalgi yillarda 56,7 ball to‘play olmaganlar ulushi 40 foizdan baland edi. Shu bilan birga, davlat oliygohlariga o‘qishga hujjat topshirayotganlar soni ham kamaymoqda: uch yil oldin milliondan ortiq yoshlar bakalavriatga hujjat topshirgan edi, 2026-yilga kelib bu ko‘rsatkich 678 minggacha (33 foizga) kamaydi.
OTMga kirish imtihonlarida 234 mingga yaqin abituriyent qoniqarsiz natija ko‘rsatdi.
2026/27 o‘quv yili uchun davlat oliy ta’lim muassasalarining bakalavriat bosqichiga hujjat topshirgan 233 935 nafar abituriyent minimal o‘tish balli – 56,7 balldan past natija qayd etdi. Bu haqda oliy ta’lim vazirining birinchi o‘rinbosari Sardor Rajabov ma’lum qildi.
Ushbu ko‘rsatkich umumiy abituriyentlar sonining 37,54 foizini tashkil etadi. So‘nggi yillarda o‘qishga kirish uchun talab qilinadigan minimal ball (maksimal ballning 30 foizi) – 56,8 balldan kam to‘plagan abituriyentlar ulushi pasayib bormoqda. Sardor Rajabovning so‘zlariga ko‘ra, bu holat abituriyentlarning bilim darajasi va test natijalari yaxshilanib borayotganidan dalolat beradi.
Biroq, shuni ta’kidlash joizki, so‘nggi yillarda abituriyentlar soni ham umumiy hisobda kamayib bormoqda. Joriy o‘quv yilida davlat oliygohlari bakalavriatiga o‘qishga kirish uchun 677,9 ming nafar abituriyent onlayn ro‘yxatdan o‘tgan. Taqqoslash uchun, 2024-yilgacha bu ko‘rsatkich 1 milliondan ortiq edi.
2026-yilda o‘qishga topshirganlar soni 2023-yilga nisbatan qariyb 340 ming nafarga yoki 33 foizga kamaygan. Abituriyentlar sonining qisqarishiga sirtqi ta’limga qabulning to‘xtatilishi ham ta’sir qilgan bo‘lishi mumkin.
Joriy yilda maktabni bitirgan yoshlar orasida 56,7 balldan past to‘plash holatlari dinamikasi yuzasidan hozircha ma’lumotlar mavjud emas.
Qayd etish kerakki, joriy yilda davlat granti asosida o‘rtacha o‘tish bali 134,6 ballni, to‘lov-kontrakt bo‘yicha esa 93,7 ballni tashkil etdi. O‘tgan o‘quv yilida bu ko‘rsatkichlar mos ravishda 121,8 va 84,9 ball bo‘lgan edi.