Osiyo o‘yinlarining rasmiylari tashkiliy muammolar uchun uzr so‘radi
Osiyo o‘yinlari tashkilotchilari tashkiliy kamchiliklar uchun uzr bildirdi
Yaponiyada davom etayotgan Osiyo o‘yinlari tashkilotchilari musobaqa paytida yuzaga kelgan transport va joylashtirish bilan bog‘liq muammolar uchun uzr so‘radi. Ular ishtirokchilar soni kutilganidan ancha ko‘p bo‘lgani xizmat ko‘rsatishda qiyinchiliklar keltirib chiqarganini bildirgandi.
Aichi-Nagoya-2026 Osiyo o‘yinlarida qatnashayotgan sportchi va rasmiylar soni 17 ming nafarga yetdi. Bu tashkilotchilar dastlab hisoblaganidan qariyb 2 ming nafarga ko‘p. Ishtirokchilar sonining keskin oshishi sportchilarni joylashtirish hamda transport tizimiga bosimni kuchaytirdi. Natijada ayrim jamoalar tor xonalar, kichik yotoqlar va transportdagi kechikishlardan shikoyat qildi.
Musobaqa tashkiliy qo‘mitasi bosh kotibi Satoshi Murate turli sabablarga ko‘ra sportchilarni joylashtirish va tashish jarayonida xatolarga yo‘l qo‘yilganini tan oldi.
“Xatolarga nima sabab bo‘lganidan qat’i nazar, xizmatlarni to‘g‘ri tashkil etish bizning mas’uliyatimiz. Buning uchun uzr so‘rayman”, dedi Murate.
Uning aytishicha, tashkilotchilar muammolarning sabablarini aniqlab, ularni takrorlamaslik ustida ishlamoqda. Murate dastlabki kunlarga nisbatan transport va joylashtirish sharoitlari ancha yaxshilanganini ham qayd etdi.
Tashkilotchilar musobaqaning ikkinchi yarmida xizmatlar sifatini yanada yaxshilashni rejalashtirmoqda. Muratening so‘zlariga ko‘ra, asosiy maqsad sportchilarga musobaqalarda to‘liq kuch bilan qatnashishlari uchun zarur sharoit yaratishdan iborat.
Transport bilan bog‘liq muammolardan mo‘g‘ulistonlik basketbolchilar ham aziyat chekdi. Jamoa avtobusi mashg‘ulotga o‘z vaqtida kelmagani sababli mashg‘ulot bekor qilingan. Mo‘g‘uliston ayollar terma jamoasi bosh murabbiyi Xavyer Garsiya Alvares bu holat jamoa uchun katta noqulaylik tug‘dirganini aytdi.
Filippinlik skvoshchi Yvonn Alissa Dalida esa kruiz kemasidagi xonasiga joylashish uchun uzoq vaqt kutishga majbur bo‘lgan. Shunga qaramay, u sportchilar uchun turar joy sifatida kemadan foydalanish tajribasini o‘ziga xos deb baholagan.