«Orzuingga ergash»: Yekaterinburg butun dunyo yoshlari muloqoti maydoniga aylandi

«Orzu ortidan»: Yekaterinburg butun dunyo yoshlari muloqot maydoniga aylandi

13 sentyabr kuni Yekaterinburgda, «Yekaterinburg-Ekspo» xalqaro koʻrgazma markazida uchinchi Xalqaro yoshlar festivalining ochilish marosimi boʻlib oʻtdi. Bu yilgi festivalda 191 mamlakatdan 10 ming kishi — 5 ming rossiyalik va 5 ming xorijlik mehmon ishtirok etmoqda.

Katta kontsert dasturi doirasida festivalning koʻplab ishtirokchilari oldida taniqli rossiyalik va xorijlik musiqa ijrochilari, jamoalar va aktyorlar, jumladan, aktrisa Yuliya Peresild, Natalya Oreyro va «Muhtasham yuz yil» seriali yulduzi Halit Ergench chiqish qilishdi. Bundan tashqari, dunyoning beshta makrohududi — Osiyo, Afrika, Yevropa, Janubiy Amerika va Yaqin Sharq delegatsiyalari oʻz milliy madaniyatlarining oʻziga xos xususiyatlari: anʼanalar, ramzlar, musiqa va raqslarini aks ettiruvchi yorqin taqdimotlarni namoyish etishdi.

Rossiya Federatsiyasi Prezidenti Vladimir Putin videoaloqa orqali festival mehmonlariga qutlov va tilak soʻzlari bilan murojaat qildi. U yoshlarni orzular ortidan borishga va birgalikdagi saʼy-harakatlar bilan dunyoni oʻzgartirishga chaqirdi, shuningdek, bu yilgi festival oʻtkaziladigan joy sifatida Uralning alohida ahamiyati va ramziy maʼnosini taʼkidladi: uning soʻzlariga koʻra, Ural zamini qadimdan ilgʻor gʻoyalar, ilmiy kashfiyotlar va sanoat inqilobi beshigi boʻlib kelgan.

«Rossiyaning sanoat, madaniy va intellektual merosining asosiy markazlaridan biri boʻlgan bu yerda boʻlmasa, yana qayerda turli mamlakatlarning yosh yetakchilari yangi texnologiyalar kirib kelishi bilan hayotimiz qanday oʻzgarayotganini, kelajak dunyosi qanday boʻlishi kerakligini muhokama qilishlari mumkin», — deya taʼkidladi davlat rahbari.

Uchinchi Xalqaro yoshlar festivali Yekaterinburgda 11 sentyabr kuni boshlandi va 17 sentyabrgacha davom etadi. Festivalning rasmiy shiori — «Orzu ortidan», asosiy gʻoyasi esa — turli mamlakatlardan kelgan yoshlarning tanishishlari, umumiy til topishlari, tajriba almashishlari va dolzarb global tahdid hamda muammolarni hal qilish yoʻllarini birgalikda izlashlari uchun ochiq muloqot maydonini yaratishdan iborat.

Festivalga boʻlgan qiziqish uning ochilishidan ancha oldin paydo boʻldi. Toʻrt oylik ariza topshirish kampaniyasi davomida tashkilotchilar 113 mingdan ortiq ariza qabul qilishdi. Bundan tashqari, festival harakati tarixida ilk bor xorijlik ishtirokchilardan tushgan arizalar soni rossiyaliklarnikidan koʻp boʻldi — 32 mingtaga farq qildi.

Bu yilgi festivalning oʻziga xos xususiyati — xorijiy delegatsiyalarni shakllantirishdagi tarmoq tamoyilidir. Yekaterinburgga fan va taʼlim, davlat boshqaruvi, biznes, sport, media, IT va raqamlashtirish, kreativ industriyalar hamda fuqarolik faolligi sohalaridan yosh mutaxassislar va yetakchilar tashrif buyurishdi. Ularning aksariyati allaqachon oʻz loyihalarini amalga oshirmoqda va yaqin yillarda oʻz mamlakatlari rivojiga sezilarli taʼsir koʻrsatishni rejalashtirmoqda.

Festivalning bosh maydonchalari «Yekaterinburg-Ekspo» xalqaro koʻrgazma markazi va Ural federal universiteti kampusi boʻldi. Festival dasturi muloqot va hamkorlik atrofida qurilgan: munozaralar va maʼruzalardan tashqari, ishtirokchilarni jamoaviy loyihalar, ijodiy va sport tadbirlari, taʼlim uchrashuvlari va turli madaniy tajribaga ega odamlarga umumiy til topish imkonini beruvchi koʻplab boshqa formatdagi voqealar kutmoqda.

Rossiya «Znaniye» (Bilim) jamiyatining maʼrifiy dasturi alohida oʻrin tutadi. Ishtirokchilar maʼruzalar, ochiq muloqotlar va munozaralarda qatnashishlari, shuningdek, taniqli ekspertlar bilan shaxsan suhbatlashishlari mumkin. Madaniy dastur ham kam emas: spektakllar, kontsertlar, kino namoyishlari, koʻrgazmalar, yarmarkalar, gastronomik festival hamda dizayn va merch marketlari, tashkilotchilarning fikriga koʻra, ishtirokchilarga nafaqat bir-birlarining madaniyati haqida bilib olish, balki ularga tom maʼnoda shoʻngʻish imkonini beradi.

Zamonaviy media sohasi ham oʻz maydonchasiga ega boʻldi: «Mediapotok» (Mediaoqim) jurnalistlar, blogerlar, prodyuserlar, fan va sanʼat vakillarini birlashtirdi. Bu yerda mediaindustriyaning transformatsiyasi, yangi texnologiyalar va kreativ industriyalarning rivojlanishi haqida soʻz bormoqda. Ishtirokchilar uchun bu nafaqat taʼlim maydonchasi, balki professionallar bilan tanishish va kelajakdagi loyihalar uchun potentsial sheriklar topish imkoniyatidir. Velnes-dastur doirasida taniqli sportchilar bilan ertalabki badantarbiya mashgʻulotlari, mahorat darslari, yugurish musobaqasi, futbol, stol tennisi va kibersport boʻyicha turnirlar oʻtkazilmoqda. Turli mamlakatlar madaniyati bilan tanishish milliy sport turlari festivali orqali ham davom etmoqda.

Alohida blok koʻngillilik va ijtimoiy tashabbuslarga bagʻishlangan. Yoshlar Dobro.rf platformasi imkoniyatlari bilan tanishib, koʻngillilik va xayriya loyihalarida ishtirok etmoqdalar hamda festival yakunlanganidan keyin ham ushbu faoliyatni davom ettirish imkoniyatiga ega boʻlmoqdalar.

Shuni ham taʼkidlash joizki, xorijlik mehmonlar uchun Rossiya bilan tanishish faqat Yekaterinburg bilan cheklanib qolmaydi. Ekskursiya dasturi doirasida ular Uralga sayohat qilib, uning tabiiy, tarixiy va madaniy merosi bilan tanishishlari mumkin boʻladi. Festivalning asosiy qismidan soʻng esa ming nafar xorijlik ishtirokchi hududlar boʻylab ekspeditsiyalarga yoʻl oladi. Ular uchun Rossiyaning 35 ta subʼyekti, «Sirius» federal hududi, shuningdek, Abxaziya va Janubiy Osetiya boʻylab 33 ta yoʻnalish tayyorlandi. Besh kunlik sayohat davomida mehmonlar mahalliy diqqatga sazovor joylar, tabiat va texnologik loyihalar bilan tanishadilar, dala tadqiqotlarida ishtirok etadilar hamda rossiyalik yoshlar va mahalliy tub kam sonli xalqlar vakillari bilan uchrashadilar.