“O‘rgimchak odam” filmidagi ko‘pchilik payqamagan xatolar

Superqahramonlar haqidagi filmlar ham insonlar tomonidan suratga olinadi, shuning uchun ularda xatolar bo‘lishi tabiiy. Keling, 2002-yilda Sem Reymi rejissyorligida suratga olingan, Tobi Maguayr va Kirsten Danst bosh rollarni ijro etgan "O‘rgimchak odam" filmidagi ba'zi kamchiliklarni ko‘rib chiqamiz. Bu film Marvel olamidagi Multikoinot haqida hech kim bilmagan davrda yaratilgan bo‘lsa-da, prokatga chiqqanidan so‘ng rekord darajada tomoshabinlarni jalb qilib, yilning eng ko‘p daromad keltirgan filmi bo‘ldi. Uning muvaffaqiyati yana ikki qismning suratga olinishiga sabab bo‘ldi, Tobi Maguayr yillar o‘tib Marvel kinoserialiga qaytdi va film ko‘plab internet memlariga ilhom berdi. Biroq, ushbu mashhur kartinada e'tibordan chetda qolgan bir qancha qiziqarli kinoxatolar mavjud.

**Bor edi-yu, g‘oyib bo‘ldi**

Piter Parker o‘zining superqobiliyatlarini kashf etganidan so‘ng, maktab oshxonasida Meri Jeynni to‘kilgan sharbat ustida sirpanib ketishdan saqlab qoladi. Ammo bir daqiqa o‘tib, Piter patnis bilan bog‘liq voqeadan keyin oshxonadan shoshilib chiqib ketganida, polga to‘kilgan sharbat allaqachon g‘oyib bo‘lgan bo‘ladi.

Filmda ba'zi buyumlar ham o‘z-o‘zidan paydo bo‘ladi. Masalan, Piter avtobus ortidan yugurayotgan sahnada Meri Jeynning iltimosi bilan haydovchi to‘xtaydi va uni avtobusga chiqaradi. O‘sha paytda avtobus oldidagi yo‘l mutlaqo bo‘sh bo‘ladi. Ammo Piter salonga kirganida, avtobus oldida birdan yuk mashinasi paydo bo‘ladi.

Yana bir shunga o‘xshash xatoni Piter xonasida o‘rgimchak to‘ridan foydalanishni mashq qilayotgan sahnada ko‘rish mumkin. U avval gazli ichimlik solingan bankani, keyin esa stol chirog‘ini o‘ziga tortadi. Chiroq devorga urilib, sinadi. Ammo shovqinni eshitib xonaga kirgan Mey xola chiroqning joyida bus-butun turganini ko‘radi.

**Vaqt bilan bog‘liq nomuvofiqliklar**

Piter va Meri Jeyn ishlaydigan kafeda suhbatlashayotgan sahnada ham vaqt bilan bog‘liq nomuvofiqlik bor. Kamera Piterga qaratilganda, uning ortidagi soyalar quyosh yuziga qarab turgandek ko‘rinadi. Ammo kadr Kirsten Danstga o‘tganda, soyalar boshqa tomonga tushadi. Go‘yo suhbat davomida quyosh tush paytidan o‘tib, kechga yaqinlashib qolgandek. Kadr almashgani sayin soyalar ham o‘zgarib turadi.

Biroq bundan ham qiziqroq vaqt xatosi Piter va Meri Jeyn kasalxonada Mey xola bilan suhbatlashayotgan sahnada kuzatiladi. Deraza ortida iliq bahor kuni aks etib turadi. Aslida esa bu suhbat Shukronalik kunining ertasiga bo‘lib o‘tadi. Shukronalik kuni esa noyabr oxirida nishonlanadi. Bu paytda Nyu Yorkda havo ancha sovuq, daraxtlardagi barglar esa deyarli to‘kilib bo‘lgan bo‘ladi.

**Jurnalistikadagi “inqiroz”**

Piter Parker fotograf bo‘lib ishga kirgan Daily Bugle tahririyatida ham qiziq xatolar bor. Bosh muharrir Jey Jonah Jeymson xodimlar gazetaning oltinchi sahifasini tayyorlay olmayotganidan jahli chiqadi. Piter O‘rgimchak odamning bir nechta suratini olib kelgach, Jeymson ularni birma-bir ko‘rib chiqadi. Suratlar orasida O‘rgimchak odam yuqoridan pastga qarab olingan kadr ham bor. Ammo surat stolga qo‘yilishi bilan undagi tasvir birdan o‘zgaradi: endi O‘rgimchak odam pastdan yuqoriga qarab, moviy osmon fonida tasvirlangan.

O‘rgimchak odam haqidagi birinchi maqolada ham qiziq xatoni ko‘rish mumkin. Ekranda katta qilib ko‘rsatilgan maqolaning birinchi va ikkinchi ustunlaridagi matn deyarli harfma-harf bir xil.

**Nyu York — klonlar shahri**

2002-yilda Nyu Yorkda shahar atroflarini hisobga olmaganda qariyb 8 million kishi yashagan. Ammo filmga qaraganda, ayrim nyu yorkliklar bir vaqtning o‘zida bir necha joyda paydo bo‘lish qobiliyatiga ega. Masalan, Goblinning “Birlik kuni” festivaliga hujumi vaqtida Piter balkonning yuqoridan qulayotgan bo‘laklari ostidan kulrang palto kiygan erkak va qora kiyimli ayolning qochib ketayotganini ko‘radi. Piter ularga yordam berishga qaror qiladi va o‘rgimchak to‘ri yordamida xavfsiz joyga xuddi shunday kiyingan boshqa juftlikni olib chiqadi. Bu juftlik esa avval hech narsadan xavotirlanmay, voqeani tomosha qilib turgan edi.

Yana bir “klonlar bosqini”ni Piter Norman Osborn bilan tanishayotgan sahnada ko‘rish mumkin. Aynan shu sahna Uillem Defo ishtirokidagi mashhur memga ham sabab bo‘lgan. Qahramonlar suhbatlashayotgan paytda ularning ortidan quyosh ko‘zoynagi taqqan, qora ryukzakli qiz uch marta o‘tib ketadi. Qiz har safar boshqa tomonga qarab harakatlanadi.

Ammo “klonlar” bo‘yicha rekord Piter va Meri Jeyn kafeda suhbatlashayotgan sahnaga tegishli. Qahramonlar gaplashayotgan paytda Parker ortidagi burchakdan kepka kiygan to‘la erkak chiqib keladi. Kadr almashgach, ko‘chada xuddi shunday yana bir erkak paydo bo‘ladi. Keyin uchinchisi, to‘rtinchisi va beshinchisi ham ko‘rinadi.