“O‘quvchilar bilimini ilmiy yo‘nalishda qo‘llashda hali kamchiligimiz bor”. Vazir — PISA 2025 natijalari haqida

“O‘quvchilar bilimini ilmiy yo‘nalishda qo‘llashda hali kamchiligimiz bor”. Vazir — PISA 2025 natijalari haqida

PISA 2025 natijalari O‘zbekiston o‘quvchilarining ko‘rsatkichlari quvonarli ekanini, shu bilan birga ta’lim tizimida hali hal etilishi kerak bo‘lgan masalalar borligini ham ko‘rsatdi.

E’zozxon Karimovaning aytishicha, PISA tadqiqotida o‘quvchilarning tabiiy fanlar bo‘yicha bilimi, maktablarda ular uchun yaratilgan ta’lim sharoitlari va yana bir qator jihatlar o‘rganilgan. Natijalar O‘zbekistonning Markaziy Osiyo davlatlari orasida yuqori o‘rinni egallaganini ko‘rsatgan.

Vazir natijalardan kelib chiqib, keyingi bosqichda e’tibor qaratilishi lozim bo‘lgan yo‘nalishlarni ham sanab o‘tdi. Uning qayd etishicha, endilikda o‘quvchilar olgan bilimlarini ilmiy yo‘nalishda qo‘llay olishiga ko‘proq e’tibor beriladi. U buni ta’lim tizimi oldidagi asosiy vazifalardan biri sifatida baholadi.

“Bolalarimiz bilimni olyapti, lekin uni ilmiy yo‘nalishda qo‘llashda hali kamchiligimiz bor ekan”, — deydi Karimova.

Uning so‘zlariga ko‘ra, ta’lim tizimidagi yana bir muhim vazifa — maktab va ota-onalar o‘rtasidagi hamkorlikni kuchaytirish. PISA tadqiqotida o‘qituvchilarning bilim berishi bilan birga, oilaning farzand ta’limiga ko‘rsatayotgan ko‘magi ham tahlil qilingan.

“O‘qituvchilarimizning bolalarga sidqidildan bilim o‘rgatishga harakat qilayotganini o‘quvchilarning o‘zlari ham tasdiqlashgan. Biroq, ota-onalarning farzandi ta’limidagi ishtiroki masalasiga ham jiddiyroq e’tibor qaratishimiz lozim”, — deydi vazir.

“Bizda shunday tendensiya shakllangan: ota-ona „farzandimning bilim olishi uchun hamma sharoitni qilib qo‘ydim, bo‘ldi“, deb o‘ylaydi. Qolgan barcha narsani — bilim olishni, hatto tarbiyani ham ta’lim tashkilotlaridan kutayotgan holatlar ko‘p kuzatilyapti”, — deya qo‘shimcha qildi Karimova.

Vazirning ta’kidlashicha, ota-ona farzandining maktabda nimani o‘rganayotgani bilan uyda ham qiziqishi kerak.

“Farzand maktabdan kelganda: „Qani, bugun nimani o‘rganding, nimani tushunding?“, deb so‘rashning o‘zi bolada mas’uliyat hissini oshiradi. Ustoz bu yoqdan so‘raydi, ota-ona u yoqdan so‘raydi”, — deydi u.

Karimova ta’limga kiritilgan investitsiyalar ham PISA natijalarida o‘z samarasini ko‘rsata boshlaganini qayd etdi. Uning so‘zlariga ko‘ra, 2022-yilda ta’lim sohasiga yo‘naltirilgan investitsiyalar natijasi hozir ko‘rina boshlagan.

“Men xursand bo‘lgan jihat — ta’limga kiritilgan investitsiya asta-sekin natijasini ko‘rsata boshladi. Bu hurmatli prezidentimiz tomonidan bolalarimizning yetarli bilim olishiga qaratilgan e’tibor va yaratilgan imkoniyatlar natijasi, deb o‘ylayman”, — deydi vazir.

PISA 2025 tadqiqoti doirasida o‘quvchilarning raqamli dunyoda ma’lumot va bilim olish darajasi, shuningdek, sun’iy intellektdan foydalanish bilan bog‘liq ko‘nikmalari ham o‘rganilgan.

E’zozxon Karimovaning aytishicha, endi o‘quvchilarga sun’iy intellektdan foydali maqsadlarda va to‘g‘ri foydalanishni o‘rgatish ta’lim tizimi oldidagi muhim vazifalardan biri bo‘ladi.

Uning so‘zlariga ko‘ra, bu yo‘nalishda amaliy ishlar ham boshlangan. Xitoy Sharqiy pedagogika universiteti tomonidan sun’iy intellekt bo‘yicha tayyorlangan qo‘llanmalar O‘zbekistonga olib kelinib, mahalliylashtirilgan va o‘zbek tiliga tarjima qilingan.

“Hozir ular chop etilyapti va sentabr oxiriga qadar barcha maktablarimizga yetkaziladi”, — deydi u.

Vazirning ta’kidlashicha, mazkur qo‘llanmalardan foydalanish natijasi keyingi PISA tadqiqotlarida namoyon bo‘lishi mumkin.

Shuningdek, Karimova O‘zbekiston xalqaro ta’lim tadqiqotlarida ishtirokini davom ettirayotgani, mamlakatning PISA 2029 tadqiqotida ishtirok etishi bo‘yicha ham kelishuvga erishilganini qayd etdi.

“Ta’lim hech qachon to‘xtamaydi”, — deydi Maktabgacha va maktab ta’limi vaziri.

Eslatib o‘tamiz, PISA 2025'da O‘zbekiston o‘quvchilari 91 ta davlat va ta’lim tizimi orasida tabiiy fanlar bo‘yicha 438 ball bilan 48-o‘rinni, “Raqamli dunyoda o‘rganish” yo‘nalishida esa 402,4 ball bilan 72-o‘rinni egallagan edi.

Matematika va o‘qish natijalari esa ma’lumotlardagi nomutanosibliklar sabab hozircha e’lon qilinmadi.