OpenAI o‘smirlar uchun ChatGPT’ning alohida versiyasini ishga tushiradi

OpenAI 18-avgustdan boshlab o‘smirlar uchun ChatGPT’ning maxsus versiyasini global miqyosda taqdim etishni boshlaydi, deb xabar beradi Financial Times (FT). Kompaniya bu qadamni sun’iy intellektning voyaga yetmaganlarga ta’siri borasidagi jamoatchilik xavotirlari kuchaygan bir paytda qo‘ymoqda.

O‘smirlar uchun mo‘ljallangan ushbu versiyada o‘ziga-o‘zi shikast yetkazish, zo‘ravonlik, ovqatlanish buzilishi va jinsiy mazmundagi tasvir hamda materiallarni yaratishga nisbatan cheklovlar kuchaytiriladi. Ilgari ChatGPT’da mavjud bo‘lgan ota-ona nazorati funksiyasi o‘z joniga qasd qilish haqidagi suhbatlar kabi o‘ta sezgir vaziyatlarda ogohlantirishlar yuborgan bo‘lsa, endi bu bildirishnomalar zo‘ravonlik va ovqatlanish buzilishi mavzularini ham qamrab oladi. O‘smirlar va oilalar bilan ishlash bo‘limi rahbari Loren Jonasning tushuntirishicha, bu funksiyalarning joriy etilishi kompaniya o‘smirlarning shaxsiy daxlsizlik huquqi va yuzaga kelishi mumkin bo‘lgan zararning jiddiyligi o‘rtasidagi muvozanatni topishga intilgani bilan bog‘liq.

FT’ning qayd etishicha, ushbu yangilanish OpenAI bir tomondan, farzandlari chat-bot bilan muloqotdan jabr ko‘rganini da’vo qilayotgan oilalarning bir nechta sud da’volariga duch kelayotgan, ikkinchi tomondan esa kelgusi yilda rekord darajadagi aksiyalarni joylashtirishga tayyorgarlik ko‘rayotgan bir vaqtda amalga oshirilmoqda. Da’vogarlar orasida Kaliforniyalik 16 yoshli Adam Reynning yaqinlari ham bor. U o‘z o‘limini ChatGPT bilan muhokama qilgach, o‘z joniga qasd qilgan; sud hujjatlariga ko‘ra, bot unga batafsil ko‘rsatmalar bergan. Shuningdek, fevral oyida Kanadaning Tambler-Rij shahridagi maktabda sodir bo‘lgan ommaviy otishmada halok bo‘lganlarning oilalari ham da’vo arizasi bilan murojaat qilishgan. Ma’lum bo‘lishicha, otishma sodir etgan o‘smir hujumdan bir necha oy oldin ChatGPT bilan zo‘ravonlik qilish niyatini o‘rtoqlashgan, uning akkaunti bloklangan, biroq kompaniya huquqni muhofaza qilish idoralariga xabar bermagan.

OpenAI qoidalariga ko‘ra, 13 yoshdan kichik bolalarga chat-botdan foydalanish taqiqlanadi, voyaga yetmaganlar uchun esa ota-onaning roziligi talab etiladi. Xizmat o‘smirlar versiyasini kimga ko‘rsatishni foydalanuvchi ko‘rsatgan yosh va bir qator bilvosita xulq-atvor belgilariga qarab aniqlaydi. O‘smirlar uchun mo‘ljallangan ChatGPT tanaffuslar haqida tez-tez eslatib turadi va "sukunat soatlari"ni qo‘llab-quvvatlaydi – bular foydalanuvchi yoki ota-onalar botga kirishni cheklash uchun o‘zi belgilashi mumkin bo‘lgan vaqt oraliqlaridir.

FT’ning yozishicha, kompaniya neyrotarmoqning bir zumdagi javoblari maktab o‘quvchilarining fikrlash va o‘rganish qobiliyatiga zarar yetkazishi haqidagi da’volarga alohida javob berishga harakat qilmoqda – bu ta’sir "kognitiv yengillashuv" deb ataladi. Yangilangan "ta’lim rejimi"da bot tayyor javob berish o‘rniga, o‘smirni topshiriq bo‘yicha bosqichma-bosqich yo‘naltirishi kerak. Jonasning so‘zlariga ko‘ra, o‘smirlarning 90 foizi ChatGPT’dan aynan ta’lim maqsadida foydalanadi va xizmatni o‘quv vositasiga aylantirish kompaniyaning asosiy maqsadidir.