Ombudsmanga murojaat qilinganidan soʻng, mahkumning tuzalish yoʻliga oʻtganligi toʻgʻrisidagi xulosa qayta koʻrib chiqildi

Advokatning Ombudsmanga qilgan murojaatidan soʻng, mahkum K.B.ning tuzalish yoʻliga oʻtmagani toʻgʻrisidagi xulosa qayta koʻrib chiqildi. Ushbu xulosani tayyorlashda yetkazilgan zararning qoplangan qismi va ilgari eʼlon qilingan ragʻbatlantirishlar hisobga olinmagani aniqlandi.

K.B. 13-sonli koloniyada jazo oʻtayotgan edi. Uning advokati mahkum moddiy zararning sezilarli qismini qoplagani, intizomiy jazolari yoʻqligi va ragʻbatlantirishlar olganini maʼlum qildi.

Ombudsman apparati xodimlari xulosani oʻrganib chiqib, zarar miqdori va qoplangan summa toʻgʻrisidagi maʼlumotlarda nomuvofiqliklarni aniqladilar. Bundan tashqari, mahkumga ilgari eʼlon qilingan ragʻbatlantirishlar ham hisobga olinmagan.

Shundan soʻng, Ombudsman IIV huzuridagi Jazoni ijro etish departamentiga taqdimnoma kiritdi. Ushbu faktlar boʻyicha xizmat tekshiruvi oʻtkazilib, uning yakunlariga koʻra masʼul xodimlarning intizomiy javobgarligi masalasini koʻrib chiqishga qaror qilindi.

Soʻngra K.B.ning holati komissiya tomonidan uning barcha aʼzolari ishtirokida qayta koʻrib chiqildi. Natijada unga tuzalish yoʻliga oʻtganligi toʻgʻrisida xulosa berildi.

Keyinroq materiallar sud tomonidan koʻrib chiqildi. K.B.ning ozodlikdan mahrum qilish jazosining qolgan muddati Jinoyat kodeksining 74-moddasiga muvofiq boshqa, yengilroq jazo bilan almashtirildi.

Shundan soʻng mahkum jazoni ijro etish muassasasidan ozod qilindi.