Olimlar 100 yil deganda yangi pingvin turini kashf qildi

Olimlar 100 yil ichida yangi pingvin turini aniqladi

Hind okeanining janubidagi Kergelen orollarida pingvinlarning yangi turi topildi. Tadqiqotchilar fikricha, bu so‘nggi 100 yildan ortiq vaqt ichida ilmiy jihatdan tavsiflangan ilk yangi pingvin turi bo‘lib, bu haqda ScienceDaily yozmoqda.

Yangi turga Pygoscelis kerguelensis nomi berildi. Ilgari bu qushlar papua pingvinlari turiga kiradi, deb hisoblangan. Ammo genetik tahlil Kergelendagi ushbu populyatsiya boshqa papua pingvinlaridan sezilarli darajada farq qilishini ko‘rsatdi.

Olimlar o‘nta koloniyadagi 64 ta pingvinning to‘liq genomini tahlil qilib, avval bitta tur deb qaralgan qushlar aslida to‘rtta mustaqil turga mansub ekanini aniqladi. Qolgan uchta populyatsiyani ham alohida tur sifatida tan olish taklif qilingan.

Tadqiqotchilar hisob-kitobiga ko‘ra, bu to‘rt tur evolyutsiya jarayonida taxminan 300–500 ming yil avval bir-biridan ajralib chiqqan. Bunga sabab bo‘lgan omillardan biri — uzoq orollarda yashagan populyatsiyalarning uzoq vaqt davomida bir-biridan geografik jihatdan ajralib qolganidir.

Olimlar ogohlantirishicha, iqlim o‘zgarishi sabab yangi pingvin turi yashab qolish bilan bog‘liq xavflarga duch kelishi mumkin. Iqlim modellariga ko‘ra, ushbu pingvinlar yashayotgan orollarda 2050-yilga borib yashashga qulay hududlar qisqarishi ehtimoli bor.

Papua pingvinlari, ya’ni Gentu pingvinlari, Antarktika yarimorolida, Janubiy Atlantika orollarida va subantarktika arxipelaglarida yashaydi. Ular eng tez suza oladigan pingvinlardan biri hisoblanadi: suvdagi tezligi soatiga qariyb 36 kilometrgacha yetishi mumkin.