OIKB Ozarbayjonda yashil energetika bogʻliqligini rivojlantirish uchun MCDF’ning 1,1 million AQSh dollari miqdoridagi grant mablagʻlarini jalb etmoqda
Tashkent Times — Oʻzbekistonning soʻnggi yangiliklarini yoritib boruvchi ingliz tilidagi onlayn-gazetadir
OIIB Ozarbayjonda yashil energetika bogʻliqligini rivojlantirish uchun MCDF’ning 1,1 million AQSh dollari miqdoridagi grantlarini jalb etmoqda
Osiyo infratuzilmaviy investitsiyalar banki (OIIB) va Ozarbayjon Respublikasi Kaspiy dengizida yirik offshor shamol energetikasini rivojlantirish uchun Kaspiy yashil energetika koridori va unga tegishli qirgʻoqboʻyi infratuzilmasini tayyorlashni qoʻllab-quvvatlash maqsadida Rivojlanishni moliyalashtirish boʻyicha koʻp tomonlama hamkorlik markazining (MCDF) moliyalashtirish fondi tomonidan ajratilgan va OIIB tomonidan jalb qilingan umumiy qiymati 1,1 million AQSh dollariga teng ikkita grant bitimini imzoladi.
Bu OIIBning Ozarbayjon bilan MCDF tomonidan qoʻllab-quvvatlanadigan Kaspiy yashil energetika koridori va Ozarbayjonda yirik offshor shamol elektr stantsiyasini qoʻllab-quvvatlash boʻyicha qirgʻoqboʻyi infratuzilmasi loyihasi boʻyicha birinchi juftlik grant bitimlaridir. Ushbu muhim voqea loyihalarni tayyorlash boʻyicha hamkorlikning yangi kanalini ochadi hamda barqaror energetika infratuzilmasiga kelajakdagi investitsiyalar va mintaqaviy bogʻliqlikni mustahkamlash uchun asos yaratishga yordam beradi.
1 million AQSh dollari miqdoridagi grant Kaspiy yashil energetika koridori boʻyicha texnik-iqtisodiy asoslashning birinchi bosqichini, jumladan, Ozarbayjon va Qozogʻistonni bogʻlaydigan va Oʻzbekiston quruqlikdagi uzatish tarmoqlari orqali ulanadigan 400 kilometrlik taklif etilayotgan suv osti elektr kabelini moliyalashtiradi. Tadqiqot loyihaning texnik, iqtisodiy, moliyaviy, ekologik va ijtimoiy maqsadga muvofiqligini, jumladan, uzatish muqobillari va chegaralararo elektr energiyasi savdosi istiqbollarini oʻrganadi. Osiyo taraqqiyot bankining (OTB) 1 million AQSh dollari miqdoridagi texnik yordami bilan bir qatorda, tadqiqotni tayyorlashni umumiy qoʻllab-quvvatlash 2 million AQSh dollarini tashkil etadi, loyiha OIIB va OTB tomonidan birgalikda tayyorlanadi.
Ikkinchi 100 000 AQSh dollari miqdoridagi grant Ozarbayjonda yirik offshor shamol energetikasini rivojlantirishni taʼminlash uchun zarur boʻlgan qirgʻoqboʻyi infratuzilmasi kontseptsiyasini ishlab chiqishni, jumladan portinfratuzilmasi, maxsus kemalar, podstantsiyalar va tarmoqga ulanishlarni qoʻllab-quvvatlaydi.
«Ushbu qoʻllab-quvvatlash Kaspiy mintaqasining qayta tiklanadigan energiya salohiyatini investitsiya qilish mumkin boʻlgan infratuzilmaga aylantirish yoʻlidagi muhim qadamdir», dedi Konstantin Limitovskiy, OIIBning Davlat sektori (2-mintaqa) hamda Loyihaviy va korporativ moliyalashtirish mijozlari (Global) boʻyicha bosh investitsiya direktori. «Chegaralararo elektr ulanishlari va offshor shamol infratuzilmasini erta bosqichda tayyorlashni qoʻllab-quvvatlash orqali biz mintaqaviy energetik integratsiya, energiyani diversifikatsiya qilish va barqaror oʻsishni kengaytirish uchun asos solishga yordam bermoqdamiz».
Grantlar Ozarbayjonga oʻzining offshor shamol salohiyatidan foydalanish imkonini beradigan, shuningdek, Markaziy Osiyo, Janubiy Kavkaz va ehtimol, Yevropa bozorlari oʻrtasida chegaralararo elektr bogʻliqligini taʼminlaydigan infratuzilmani tayyorlashni mustahkamlashga qaratilgan dastlabki bosqichdagi texnik va iqtisodiy ishlarni moliyalashtiradi.
«OIIB bilan imzolangan grant bitimlari Ozarbayjonning Kaspiy dengizida yirik offshor shamol energetikasini rivojlantirish va mintaqaviy hamda qitʼalararo yashil energiya uzatishni ilgari surish boʻyicha strategik maqsadlari baynalminal darajada qoʻllab-quvvatlanayotganini koʻrsatadi», dedi Ozarbayjon Respublikasi Energetika vaziri Parviz Shahbazov. «Ikkala loyiha ham Ozarbayjonning boy qayta tiklanadigan energiya salohiyatini iqtisodiy qiymatga aylantirish, Kaspiy mintaqasi va Markaziy Osiyodan yashil energiya resurslari eksportini yengillashtirish va mamlakatimizning mintaqaviy energetika integratsiyasidagi strategik rolini yanada mustahkamlash uchun strategik ahamiyatga ega».
Grantlar OIIBning mintaqaviy bogʻliqlikni oshiradigan va yashil oʻtishni qoʻllab-quvvatlaydigan loyihalar uchun yuqori sifatli, chegaralararo infratuzilmani tayyorlash va resurslarni jalb qilish boʻyicha hamkorlar bilan ishlash borasidagi kengroq saʼy-harakatlarining bir qismidir.