Ogʻa-ini Aleksandrlarning har biri jinsiy trafik ishi boʻyicha 30 yillik qamoq jazosiga hukm qilindi
Uch nafar aka-uka oʻn yillar davomida bir nechta ayollarni giyohvand moddalar bilan zaharlash va zoʻrlashda aybdor deb topildi.
Aka-uka Aleksanderlarning har biri odam savdosi (jinsiy foydalanish) boʻyicha 30 yilga ozodlikdan mahrum etildi
Uch aka-uka, jumladan, koʻchmas mulk sohasidagi ikki boy magnat bir necha oʻn yillar davomida oʻnlab ayollarni giyohvand moddalar bilan mast qilib, zoʻrlagani uchun har biri 30 yillik qamoq jazosiga hukm qilindi.
40 yoshli Tal Aleksander hamda 39 yoshli egizaklar Oren va Alon Aleksanderlar martalda oʻz boyliklari va jamiyatdagi mavqeidan foydalanib, ayollarni ziyofatlar va hashamatli xonadonlarga jalb qilib, u yerda ularga nisbatan jinsiy zoʻravonlik qilganlikda aybdor deb topildi.
Seshanba ertalab Nyu-York sudi 12 nafar jabrlanuvchining, jumladan, sudda guvohlik bermagan bir ayolning aka-uka Aleksanderlar tomonidan zoʻrlanganidan keyin chekkan ruhiy azoblari va oʻzlari his qilgan uyat tuygʻusi endi sudlanuvchilar zimmasiga tushishini istashlari haqidagi koʻrsatmalarini tingladi.
Koʻpchilik sudyadan har bir aka-ukaga maksimal darajadagi — umrbod qamoq jazosini berishni soʻradi.
Maya Miller sudda 2014 yilda Tal Aleksander uni zoʻrlaganidan keyin oʻzini boshqa xavfsiz his qilmaganini aytdi.
«Agar bu voqea boshimga tushmaganida boʻlishim mumkin boʻlgan inson uchun ichimda sukunatli dafn marosimini oʻtkazyapman», dedi u.
Isa Bruks taxallusidan foydalangan boshqa bir jabrlanuvchi 16 yoshida Tal va Alon Aleksanderlar uni zoʻrlaganidan keyin oʻziga boʻlgan ishonchni yoʻqotganini aytdi.
« Juda kech boʻlgunga qadar qanday xavf ostida ekanimni umuman bilmasdim», dedi u.
Yana bir ayolning aytishicha, u zoʻrlangani haqida ochiq gapirishni rejalashtirganida, Tal Aleksander uning singlisi qayerda ishlashini bilishini aytib tahdid qilgan.
Ayollar gapirayotganda, uch aka-uka Aleksander deyarli hech qanday hissiyot koʻrsatmadi. Ular oldinga qarab oʻtirishdi yoki oʻz advokatlari bilan sekin gaplashishdi. Advokatlar esa tikilib qarash deb notoʻgʻri talqin qilinmasligi uchun oʻz mijozlariga ayollar gapirayotganda ularga qaramaslikni maslahat berishganini aytdilar.
Prokuror Elizabet Espinosa aka-ukalar oʻz jinoyatlari uchun eng ogʻir jazoga loyiq ekanini aytib, ishdagi dalillar «haqiqatan ham ayanchli manzarani namoyon etishini» taʼkidladi.
«Yillar davomida ular ayollarni hashamat vaʼdasi bilan oʻziga jalb qilish usullarini sayqallab kelishgan», dedi u va ular «ortlarida qoldirgan azob-uqubatlarga umuman befarq boʻlishganini» qoʻshimcha qildi.
Besh hafta davom etgan sud jarayonida 11 nafar ayol, jumladan, hujumlar sodir boʻlgan paytda voyaga yetmaganini aytgan bir necha kishi, aka-ukalar ularga sovgʻalar berishganini hamda Aspen va Bagama atrollari kabi joylarga samolyotda olib borishganini, u yerda zoʻrlanishdan oldin ularga giyohvand moddalar berilganini aytib guvohlik berdi.
Prokurorlarning taʼkidlashicha, aka-ukalarning shafqatsiz xulq-atvori maktab yillaridan boshlangan, garchi sud jarayoni 2008 yilgacha boʻlgan jinoyatlarga qaratilgan boʻlsa-da.
Ular uch aka-ukani ayollarning ichimliklariga giyohvand moddalar solib qoʻyganlikda aybladilar va ular «zoʻrlash va jinsiy zoʻravonlik paytida jabrlanuvchilarni jismonan ushlab turgankini hamda ularning dod-voylari va toʻxtash haqidagi ochiq-oshkora iltimoslariga eʼtibor bermaganini» bildirdilar.
Aka-ukalarning advokatlari jinsiy aloqa oʻzaro rozilik bilan boʻlganini va ular jinsiy zoʻravon emas, balki shunchaki ayollarning ortidan yuruvchilar boʻlganini taʼkidladilar. Ular aka-ukalar uchun eng kam jazo — 15 yil berilishini soʻrashdi.
Aka-ukalardan ikkitasi, Tal va Oren, Nyu-York va Mayamidagi hashamatli koʻchmas mulklarni sotish orqali boylik orttirishgan.
Ular Amerikaning Douglas Elliman yirik koʻchmas mulk gigantida ishlab, Lindsi Loxan, Kim Kardashyan va Kanye Uest kabi mashhurlar uchun uylarni sotishgan. 2022 yilda ular Nyu-Yorkda joylashgan Official nomli oʻz kompaniyalarini ishga tushirishdi. Alon esa oilaning Kent Security xususiy xavfsizlik kompaniyasida ishlagan.
Hukm oʻqib eshittirilayotganda aka-ukalar hech qanday munosabat bildirmadilar va hissiyot koʻrsatmay, toʻgʻriga tikilib oʻtirishdi.