Oddiy printer surati gʻolib boʻldi: mikroskop ostidagi hayratlanarli dunyo
Siyohning qogʻozga tushishi, tanasiga gul changi yopishgan oʻrgimchak va sichqon miyasidagi neyronlar - Nikon Small World 2026 mikrofotografiya tanlovida shu tasvirlar eng yuqori oʻrinlarni egalladi. Bu yil 69 mamlakatdan 1803 ta surat taqdim etilgan tanlovda hakamlar jami 86 ta ishni eʼtirof etdi.
Oddiy printer tasviri gʻolib chiqdi: mikroskop ostidagi hayratlanarli olam
Nikon kompaniyasi mikroskop yordamida olingan eng taʼsirli suratlarni tanlaydigan tanlovini 52-marta oʻtkazdi. Gʻolib ishlar odatda koʻz ilgʻamaydigan tafsilotlar orqali kundalik hayotga boshqacha nigoh tashlash imkonini beradi.
Birinchi oʻrin Germaniyaning Kyoln shahridagi talaba va tajribali fotograf Ole Bilfeldtga nasib etdi. U purkagichli printerning qogʻozga siyoh tushirish jarayonini mikroskop orqali tasvirga olgan.
Bilfeldt buning uchun oʻzi maxsus suratga olish moslamasini yasagan. Uning Macrofying nomli loyihasi ham oddiy buyum va jarayonlarni mikrofotografiya orqali kutilmagan jihatdan namoyish etishga bagʻishlangan.
Fotografning aytishicha, printerda chop etish jarayoni shu qadar tez va takroriyki, odamlar uning mikroskopik darajada qanday kechishi haqida deyarli oʻylamaydi. Kamera esa ana shu odatiy jarayonning koʻzga koʻrinmas tafsilotlarini ochib beradi.
Ikkinchi oʻrinni Jon-Oliver Dann egalladi. Uning suratida tanasiga gul changi yopishgan sakrovchi oʻrgimchak — Salticus scenicus tasvirlangan.
Uchinchi oʻrin Kaelin Vulf va Reychel Flannerining sichqon miyasidagi neyronlar aks etgan ishiga berildi.
Tanlovda yuqori baholangan boshqa ishlar orasida hasharotlar, oʻsimliklar, hujayralar va hatto elektr razryadi taʼsiridagi qalam grifeli tasvirlari ham bor.