“Obsessiya” filmidagi Indi Navarretti “Oskar”ga nomzod bo‘ldi
“Obsessiya” filmidagi Indi Navarretti “Oskar” uchun nomzod sifatida ko‘rsatiladi
Focus Features studiyasi yaqinlashib kelayotgan “Oskar” taqdimotida “Obsessiya” horror filmini ilgari surish kampaniyasini boshlab yubordi. Variety xabariga ko‘ra, studiya Karri Barker suratidagi yorqin ijrosi uchun Indi Navarrettini “Eng yaxshi ayol roli” nominatsiyasiga da’vogar sifatida taqdim etmoqchi. Bundan tashqari, kartinani nomzodlikka da’vo qilishi mumkin bo‘lgan deyarli barcha yo‘nalishlarda ham ko‘rsatish rejalashtirilgan.
Studiyaning o‘zi Barkerni bir vaqtning o‘zida uchta yo‘nalishda — “Eng yaxshi rejissyor”, “Eng yaxshi original ssenariy” va “Eng yaxshi montaj” — nomzod sifatida ilgari surmoqda. Avvalroq Shon Beyker bilan ham shunga o‘xshash holat kuzatilgan edi: uning “Anora” filmi rejissura, ssenariy va montaj bo‘yicha mukofotlarni qo‘lga kiritgandi.
Navarretti butun kampaniyaning markaziy figurasiga aylanishi kutilmoqda. Focus Features uning “Obsessiya”dagi ijrosi filmga e’tiborni kuchaytirib, boshqa yo‘nalishlardagi imkoniyatlarini ham mustahkamlashiga umid qilmoqda.
“Obsessiya” prokatda allaqachon yaxshi natija ko‘rsatgan — 750 ming dollarlik byudjet bilan suratga olingan film dunyo bo‘ylab 505,6 million dollardan ortiq daromad olgan.
Shu mavsumda Focus Features Endryu Skott ishtirokidagi “Elsinor” dramasini, Deyzi Edgar-Jons qatnashgan “Aql va idrok” asarining yangi talqinini, shuningdek, Robert Eggersning “Bo‘ri odam” nomli yangi horror filmini ham targ‘ib qiladi.
“Obsessiya” filmini “Oltin globus”ga ham yuborishmoqchi — uni qaysi yo‘nalishda taqdim etish hali hal qilinmagan.