OAV: AQSH Quruqlik qoʻshinlari vaziri isteʼfoga chiqmoqda
AQSH Quruqlik qoʻshinlari vaziri Deniyel Driskoll Pentagon rahbari Pit Hegset bilan bir necha oy davom etgan kelishmovchiliklardan soʻng prezident Donald Trampga isteʼfo arizasini topshirdi. NBC News manbalariga koʻra, Oq uy uning isteʼfosini qabul qilgan.
OAV xabarlariga koʻra, AQSH Quruqlik qoʻshinlari vaziri Deniyel Driskoll isteʼfoga chiqmoqda. Bu haqda dastlab The Wall Street Journal manbalariga tayanib xabar berilgan, keyinchalik Reuters va AP ham ushbu maʼlumotni tasdiqlagan.
NBC News manbalarining xabar berishicha, Oq uy Driskollning isteʼfosini qabul qilgan. The Wall Street Journal maʼlumotlariga koʻra, u yaqin kunlarda Pentagonni tark etishi kutilmoqda.
Driskollning isteʼfoga chiqishiga mudofaa vaziri Pit Hegset bilan AQSH Qurolli kuchlarini rivojlantirish yoʻnalishi va bir qator yuqori martabali ofitserlarni lavozimdan ozod etish masalalarida bir necha oylik kelishmovchiliklar sabab boʻlgan.
Oq uy matbuot kotibining birinchi oʻrinbosari Anna Kellining taʼkidlashicha, Driskoll AQSH Quruqlik qoʻshinlari vazirligida Donald Tramp maʼmuriyati dasturini amalga oshirishda samarali ishlagan. U harbiy tayyorgarlik va qurollarning jangovar samaradorligiga ustuvor ahamiyat bergan, shuningdek, Rossiya va Ukraina oʻrtasidagi muzokaralarga koʻmaklashgan.
Driskollning isteʼfoga chiqishi mumkinligi haqidagi xabarlar avvalroq ham tarqalgan edi. The Wall Street Journal 21-avgust kuni u Pit Hegset bilan kelishmovchiliklar tufayli yil oxiriga qadar lavozimini tark etishni rejalashtirayotgani haqida yozgan edi.
Reutersning baholashicha, Driskollning ketishi Donald Trampning ikkinchi prezidentlik muddati davrida Pentagon rahbariyatining turli boʻgʻinlarida amalga oshirilayotgan kadrlar almashinuvining navbatdagi bosqichi boʻlishi mumkin. Joriy yil aprel oyida AQSH Quruqlik qoʻshinlari shtabi boshligʻi Rendi Jorj va bir qator boshqa yuqori martabali harbiy amaldorlar lavozimidan ozod etilgan edi.
Deniyel Driskoll AQSH vitse-prezidenti Jey Di Vensning doʻsti va sobiq kursdoshi hisoblanadi. U 2025-yil noyabrida Kit Kellog oʻrniga Donald Trampning Ukraina boʻyicha maxsus vakili etib tayinlangan.
Driskoll AQSH Quruqlik qoʻshinlari vaziri lavozimini 2025-yil fevral oyidan buyon egallab kelayotgan edi. Reuters qayd etishicha, u bu lavozimda armiyani qurollantirishda "moslashuvchan yondashuv" tarafdori boʻlib, nisbatan arzon qurol-yarogʻ xarid qilishni qoʻllab-quvvatlagan va yirik qurol ishlab chiqaruvchilarni tanqid qilib kelgan.