«Oʻzbekneftgaz» yil oxirigacha kunlik gaz qazib olish hajmini 65 million kub metrga yetkazishni maqsad qilgan
«Oʻzbekneftgaz» eskirgan konlarda gaz qazib olish hajmining kamayishini yangi ochilgan konlar va quduqlardan olinayotgan mahsulot hisobiga toʻliq qoplashning uddasidan chiqa olmadi. Davlat kompaniyasi quduqlarni taʼmirlash, qoʻshimcha burgʻilash va kompressor stantsiyalarini ishga tushirish orqali 2026 yil oxirigacha kunlik qazib olish hajmini 65 million kub metrgacha tiklashni maqsad qilgan.
«Oʻzbekneftgaz» yil oxirigacha kunlik gaz qazib olishni yana 65 million kub metrga yetkazishni rejalashtirmoqda
Kompaniya bosh geologi Nodir Muhiddinov 27 oktyabr kuni oʻtkazilgan matbuot anjumanida vaziyatni tavsiflab berdi.
2026 yilning yanvar-sentyabr oylarida «Oʻzbekneftgaz» va uning shoʻʼba korxonalari tomonidan 17 milliard kub metr atrofida gaz qazib olindi. Kompaniya butun yil davomida qazib olish hajmi 22,8 milliard kub metrni tashkil etishini kutmoqda, bu 2025 yildagi 25,2 milliard kub metr koʻrsatkichga nisbatan kamdir. Agar ushbu prognoz amalga oshsa, yillik qazib olish taxminan 9,5 foizga kamayadi.
Muhiddinov qazib olish hajmi kamayishining asosiy sababi yirik gaz konlarida zaxiralarning tugab borayotgani, u yerda qazib olish mumkin boʻlgan zaxiralarning 80 foizdan ortigʻi allaqachon qazib olingani bilan bogʻliqligini aytdi. Ushbu konlarda qazib olish hajmi kamayishda davom etmoqda, yangi qidiruv ishlari va foydalanishga topshirilgan quduqlar esa hozircha yoʻqotishlar oʻrnini qoplay olgani yoʻq.
«Hozirda yangi qidiruv ishlari va yangi ochilgan konlardagi yangi quduqlardan qoʻshimcha qazib olish ushbu pasayishni toʻliq qoplamaydi», — dedi bosh geolog.
Yil boshida «Oʻzbekneftgaz» kuniga 65 million kub metr gaz qazib olayotgan edi. Oʻshandan beri bazaviy qazib olish kuniga 12,6 million kub metrga kamaydi va shundan taxminan 5 million kub metri hali ham qoplangani yoʻq.
Pasayishni kamaytirish uchun kompaniya yil boshidan buyon oʻz mablagʻlari hisobidan 79 ta quduqda mukammal va joriy taʼmirlash ishlarini amalga oshirdi.
«Oʻzbekneftgaz» dekabr oyiga qadar kunlik qazib olish hajmini yil boshidagi darajaga qaytarishni maqsad qilgan. Uning rejalariga quduqlarni taʼmirlashni davom ettirish va geologiya-qidiruv ishlari davomida aniqlangan obʼyektlarni foydalanishga topshirish kiradi.
Kompaniya shuningdek, quduq ogʻzi kompressor stantsiyalarini ishga tushirishni va murakkab mukammal taʼmirlashni, jumladan, foydalanishdan chiqarilgan quduqlarda yon tarmoqlarni burgʻilashni rejalashtirmoqda.