«Oʻzbekneftgaz» Saneg bilan bitim bekor qilinganidan keyin Fargʻona NQIni oʻz tarkibiga qaytarishni taklif qilmagan

«Oʻzbekneftgaz» Saneg bilan bitim bekor qilinganidan keyin Fargʻona NQIni oʻz tarkibiga qaytarish taklifi bilan murojaat qilmagan

«Oʻzbekneftgaz» Fargʻona neftni qayta ishlash zavodi (FNQI) davlat mulkiga oʻtganidan keyin korxonani kompaniya tarkibiga qaytarish boʻyicha hech qanday taklif yubormagan.

Bu haqda «Oʻzbekneftgaz» boshqaruvi raisining birinchi oʻrinbosari Suhrob Hamrayev 27 oktyabr kuni oʻtkazilgan matbuot anjumanida jurnalistlarning Fargʻona NQIning keyingi taqdiri haqidagi savollariga javob berar ekan, maʼlum qildi.

Kompaniya vakilining soʻzlariga koʻra, zavod «Oʻzbekneftgaz» tarkibidan hali 2018 yilda, Davlat aktivlarini boshqarish agentligiga (DABA) topshirilgan vaqtda chiqqan. Keyinchalik korxona xususiylashtirishga qoʻyilgan.

«Sakkiz yildirki, Fargʻona NQI „Oʻzbekneftgaz“ tarkibiga kirmaydi. Menga maʼlum boʻlishicha, hozirda korxona Davlat aktivlarini boshqarish agentligi tasarrufiga qaytarilgan. Biroq agentlik va investor oʻrtasida yuzaga kelgan majburiyatlarning tafsilotlari bizga maʼlum emas», — dedi «Oʻzbekneftgaz» vakili.

Zavodni «Oʻzbekneftgaz»ga qaytarish koʻrib chiqilyaptimi, degan savolga javob berar ekan, raisning birinchi oʻrinbosari DABA aktivni keyingi boshqarishning bir nechta variantini oʻrganayotganini maʼlum qildi.

Uning soʻzlariga koʻra, mumkin boʻlgan yechimlar orasida korxonani boshqarish tizimini oʻzgartirish, «Oʻzbekneftgaz»ga qaytarish, investorlarni jalb qilish yoki xususiylashtirish bor.

Shu bilan birga, Hamrayev zavodni «Oʻzbekneftgaz»ga topshirish boʻyicha yakuniy qaror hali qabul qilinmaganini taʼkidladi.

«Oʻzbekneftgaz»ning oʻzi zavodni oʻz tarkibiga qaytarish boʻyicha taklif yuborganmi, degan aniqlashtiruvchi savolga Suhrob Hamrayev salbiy javob berdi.

Eslatib oʻtamiz, 2020 yilda Fargʻona NQI Jizzakh Petroleum kompaniyasiga ishonchli boshqaruvga berilgan edi, u keyinchalik Sanoat Energetika Guruhi (Saneg) deb qayta nomlandi.

2022 yil may oyida Davlat aktivlarini boshqarish agentligi zavoddagi davlat ulushi Saneg kompaniyasiga 100 mln dollarga sotilganini eʼlon qilgan edi.

Bitim shartlariga koʻra, investor korxonani modernizatsiya qilishga 380 mln dollar sarmoya kiritish majburiyatini ham olgan. Loyihada neftni qayta ishlash chuqurligini oshirish, benzin va dizel yoqilgʻisining zamonaviy turlarini ishlab chiqarish, shuningdek, ishlab chiqarish quvvatlarini kengaytirish koʻzda tutilgan edi.

Biroq 2026 yil iyun oyi boshida Fargʻona NQI yana toʻliq davlat mulkiga oʻtgani maʼlum boʻldi.

Korxona va tashkilotlarning yagona davlat registri maʼlumotlariga koʻra, ustav fondi 124,54 mlrd soʻm boʻlgan zavodning yagona muassisi 100 foizlik ulush bilan Davlat aktivlarini boshqarish agentligi boʻldi.

Hali 2026 yilning may oyida agentlikka korxonaning 58,5 foizi, Saneg`ga esa 41,5 foizi tegishli edi.

8 oktyabr kuni Davlat aktivlarini boshqarish agentligi direktori Sohibjon Murodov Fargʻona NQIning davlatga qaytarilishini investorning moliyaviy qiyinchiliklari bilan izohladi.

Uning soʻzlariga koʻra, Saneg`da boshqa loyihalarni amalga oshirishda yuzaga kelgan muammolar kompaniyaning sotib olingan zavod uchun toʻlov majburiyatlarini oʻz vaqtida bajarish qobiliyatiga taʼsir qilgan.

«Investorda boshqa investitsiya loyihalarida moliyaviy qiyinchiliklar yuzaga keldi, shu sababli toʻlov majburiyatlarini bajarishda muammolar paydo boʻldi. Oqibatda biz shartnomani bekor qildik va bugungi kunda aktiv davlatga qaytarildi», — dedi Murodov.

U oldi-sotdi shartnomasida toʻlovlar uch oyga kechiktirilgan taqdirda sotuvchining kelishuvni bir tomonlama bekor qilish huquqi koʻzda tutilganini aniqlashtirdi.

Qaror qabul qilishdan oldin agentlik xalqaro yuridik konsultantlarni jalb qildi va investorni shartnoma bekor qilingani haqida xabardor etdi.

Shu bilan birga, Saneg zavod uchun toʻlab berishga ulgurgan aniq summa, qolgan majburiyatlar miqdori va shartnoma bekor qilinganidan keyingi moliyaviy oʻzaro hisob-kitoblar tartibi oshkor qilinmadi.

8 oktyabr kuni Sohibjon Murodov Fargʻona NQIni qayta xususiylashtirish masalasi oʻsha paytda koʻrib chiqilmaganini maʼlum qildi.

Uning soʻzlariga koʻra, korxona uchun qisqa muddatli strategiya ishlab chiqilgan va moliyaviy sogʻlomlashtirishga kirishilgan.

Bundan tashqari, korxonada uning moliyaviy majburiyatlarining haqiqiy hajmini aniqlashi kerak boʻlgan xalqaro audit oʻtkazilmoqda. Tekshiruv yakunlari boʻyicha qarzlarni uzish yoki qayta tarkiblash tartibini belgilash nazarda tutilgan.

2025 yil yakunlariga koʻra, FNQI 538,1 mlrd soʻm miqdorida zarar koʻrdi. 2026 yil yanvar oyida Enter Engineering, Eriell Group va Saneg`ni moliyaviy barqarorlashtirish chora-tadbirlari doirasida hukumat ishchi guruhga bir qator strategik loyihalarni, jumladan, Fargʻona NQIni modernizatsiya qilishni yakunlay oladigan yangi investorlar uchun takliflar tayyorlashni topshirdi.

Fargʻona neftni qayta ishlash zavodi Markaziy Osiyodagi eng yirik yonilgʻi-moylash materiallari ishlab chiqaruvchilaridan biri hisoblanadi. Korxona benzin, dizel yoqilgʻisi, aviakerosin, motor va industrial moylar, bitum hamda boshqa neft mahsulotlarini ishlab chiqaradi.

Eslatib oʻtamiz, Saneg bilan bogʻliq aktivlar bilan bogʻliq bir qator bitimlar «Oʻzbekneftgaz» boshqaruvining sobiq raisi Bahodirjon Sidiqov va boshqa aybdorlarga nisbatan qoʻzgʻatilgan jinoyat ishining predmetiga aylandi.