«Oʻzbekneftgaz» kunlik gaz qazib olish hajmini 3,9 mln m³ ga oshirishni rejalashtirmoqda

«Oʻzbekneftgaz» sutkalik gaz qazib olishni 3,9 mln m³ ga oshirishni rejalashtirmoqda

«Oʻzbekneftgaz» AJ boshqaruvi raisi Abdugʻani Sanginov toʻqqiz oylik davr yakuniga qadar yangi quduqlarni ishga tushirish hisobiga tabiiy gazning sutkalik qazib olinishini 3,9 mln kub metrga oshirishni taʼminlash boʻyicha topshiriq berdi. Yana sutkasiga 460 ming kub metr gazni 16 ta quduqni kapital taʼmirlash evaziga olish koʻzda tutilgan.

Kompaniyadagi kengaytirilgan apparat yigʻilishi toʻqqiz oylik kutilayotgan ishlab chiqarish-iqtisodiy natijalar, mavjud xavf-xatarlar va yil yakuniga qadar bajarilishi lozim boʻlgan vazifalarga bagʻishlandi.

Yigʻilish oʻtkazilgan vaqtda toʻqqiz oylik davr yakunlanishiga 24 kun qolgan edi. Shu munosabat bilan kompaniya rahbariyatiga har bir yoʻnalish boʻyicha rejalar ijrosiga eʼtibor qaratish, mavjud kamchiliklarning aniq sabablarini belgilash va qisqa muddatlarda zarur choralarni koʻrish topshirildi.

«Bugun har bir yoʻnalish boʻyicha aniq savol qoʻyilishi kerak: nimani rejalashtirgan edik, nimaga erishdik, nima bajarilmay qoldi, qolgan qisqa fursatda yana nimalar qilinishi kerak va qanday natijaga erishishimiz lozim?» — dedi Abdugʻani Sanginov.

Yigʻilish ishtirokchilari tabiiy gaz qazib olish rejasining bajarilishini alohida muhokama qildilar. Rahbariyatga belgilangan koʻrsatkichlarga erishish uchun qoʻshimcha imkoniyatlarni ishga solish, qazib olish surʼatlarini oʻtgan yilning shu davriga nisbatan mos darajada saqlab qolish va mavjud zaxiralardan samarali foydalanishni taʼminlash topshirildi.

Buning uchun har bir kon, har bir quduq va obʼyekt boʻyicha vaziyat tahlilini kuchaytirish, ishlarni manzilli tashkil etishni taʼminlash va yillik rejani bajarish boʻyicha amaliy chora-tadbirlarni tezlashtirish zarur.

Yigʻilishda, shuningdek, avgust oyida ishga tushirilishi rejalashtirilgan quduqlar boʻyicha yakunlar sarhisob qilindi. Shu bilan birga, toʻqqiz oylik davr yakuniga qadar sentyabr oyi rejasida koʻzda tutilgan quduqlarni ishga tushirish vazifasi qoʻyildi. Buning hisobiga sutkalik qazib olishni 3,9 mln kub metrga oshirish zarur.

Sutkasiga 460 ming kub metr hajmdagi qoʻshimcha oʻsish 16 ta quduqni kapital taʼmirlash hisobiga taʼminlanishi kerak.

Qayta ishlash sohasida ishtirokchilar gaz kondensati, oltingugurt va suyultirilgan gaz ishlab chiqarishni tahlil qildilar. Tizim korxonalariga yil yakunlari boʻyicha ushbu mahsulotlarni ishlab chiqarish hajmini belgilangan rejaga nisbatan 120 foizga yetkazish vazifasi qoʻyildi.

Shuningdek, neft mahsulotlarini qayta ishlovchi korxonalarni xomashyo bilan taʼminlash masalasi ham koʻrib chiqildi.

Yigʻilishning alohida bloki avariyaviy toʻxtashlarning oldini olish, kuz-qish davriga tayyorgarlik koʻrish, transport vositalarining holati, raqamlashtirish, ishlab chiqarishni mahalliylashtirish va investitsiya loyihalarini amalga oshirishga bagʻishlandi.

Xususan, mutasaddi shaxslarga 1 oktyabrga qadar siquv kompressor stantsiyalarini ishga toʻliq tayyorlash topshirildi.

Raqamlashtirishni muhokama qilish chorasida Abdugʻani Sanginov joriy etilayotgan yechimlarning amaliy samaradorligi asosiy mezon boʻlib qolishi kerakligini taʼkidladi.

«Biz raqamlashtirishni taqdimotlar va hisobotlarda emas, balki ishlab chiqarish samaradorligida koʻrishimiz kerak», — dedi boshqaruv raisi.

Yigʻilishda «E-Kon», «Parmalash markazi», ERP va BI tizimlarini joriy etish, shuningdek, neft bazalarida raqamlashtirishni yakunlashning uzil-kesil muddatlari belgilandi.

Shu bilan birga, kompaniyada 2027 yilga tayyorgarlik koʻrish boshlab yuborildi. Geologiya-qidiruv ishlari, geologiya-texnik tadbirlar dasturini, qazib olish va ishlab chiqarish balansini, manzilli qurilish dasturini, investitsiya dasturini va xaridlar portfelini shakllantirishni tezlashtirish vazifalari qoʻyildi.

«Toʻqqiz oylik davrni ijobiy yakunlash uchun bizda 24 kun bor. 24 kun — qisqa muddat. Ammo barcha yoʻnalishlarda ish toʻgʻri tashkil etilsa va kundalik nazorat taʼminlansa, natijaga erishish mumkin. Har bir rahbar oʻz yoʻnalishi boʻyicha yakuniy natija uchun shaxsan javobgardir», — dedi Abdugʻani Sanginov.

Yigʻilishning asosiy vazifalari etib belgilangan koʻrsatkichlar ijrosini kuchaytirilgan nazorat ostida taʼminlash, orqada qolishlarni bartaraf etish, shuningdek, kompaniyaning moliyaviy va ishlab chiqarish samaradorligini oshirish belgilandi.