Oʻzbekistonning yosh arxitektorlari Xitoyda qurilish texnologiyalarini oʻrganmoqda
Xitoydagi stajirovka doirasida Oʻzbekistonning yosh arxitektorlari zamonaviy qurilish materiallari, texnologiyalar va shaharsozlikka oid ilgʻor yondashuvlarni oʻrganmoqdalar.
Oʻzbekistonning yosh arxitektorlari Xitoyda qurilish texnologiyalari bilan tanishmoqda
Oʻzbekiston Respublikasi Qurilish va uy-joy kommunal xoʻjaligi vazirligining yosh arxitektorlaridan iborat delegatsiya Xitoyda xorijiy stajirovkani oʻtamoqda, unda zamonaviy qurilish materiallari, texnologiyalar va shaharsozlikka oid ilgʻor yondashuvlarni oʻrganmoqda.
Delegatsiya tashrif buyurgan ilk obʼyektlardan biri metall buyumlar ishlab chiqarishga ixtisoslashgan Sichuan Wangang Metal Product zavodi boʻldi.
Delegatsiya aʼzolariga metall varaqlardan yasalgan yigʻma qoliplash (opalubka) tizimlari koʻrsatildi, shuningdek, ularning turlari, texnik imkoniyatlari va qurilishda foydalanishning afzalliklari haqida maʼlumot berildi.
Bunday tizimlarni qoʻllash qurilish ishlari muddati va xarajatlarini qisqartirishga, konstruktsiyalar sifatini yaxshilashga va seysmik xavfsizlik talablariga rioya qilishga yordam beradi.
Kichik ulanadigan elementlardan yaxlit konstruktsiyalarni yigʻish imkoniyati murakkab shakldagi binolar va baland inshootlar qurilishini yengillashtiradi. Bundan tashqari, qoliplardan koʻp marotaba foydalanish qurilishning iqtisodiy samaradorligini oshiradi.
Tashrif davomida yosh arxitektorlar xitoylik mutaxassislar va ishlab chiqaruvchilar bilan fikr almashib, Oʻzbekistonda koʻp qavatli turar joy binolari, ijtimoiy infratuzilma obʼyektlari va baland binolar qurilishida ushbu texnologiyalarni joriy etish istiqbollarini muhokama qildilar.
Sinov maydonchasida ularga qoliplarni montaj qilish, beton quyish, u qattiqlashgandan soʻng konstruktsiyani demontaj qilish va elektr payvandlash ishlarini bajarish namoyish etildi.
Bundan tashqari, Xitoyda Sichuan arxitektura texnologiyalari universiteti bazasida oʻzbek delegatsiyasi uchun oʻquv dasturining rasmiy ochilish marosimi boʻlib oʻtdi. Tadbirda universitet rahbariyati va oʻqituvchilari, shuningdek, xususiy sektor vakillari ishtirok etdi.
Ishtirokchilar qurilish sohasini rivojlantirish uchun xalqaro tajriba almashish hamda zamonaviy bilim va texnologiyalarni oʻzlashtirish muhimligini taʼkidladilar. Islohotlar muvaffaqiyati koʻp jihatdan dolzarb bilim va amaliy koʻnikmalarga ega mutaxassislarning malakasiga bogʻliqligi alohida qayd etildi.
Dastur nazariy mashgʻulotlar va ilgʻor yechimlarni amaliy oʻrganishni oʻz ichiga oladi. Asosiy yoʻnalishlar qatorida — shaharsozlikni raqamlashtirish, energiya samaradorligini oshirish, energiyani tejash, yashil hududlarni saqlab qolish va shahar muhitining ekologik barqarorligini mustahkamlash oʻrin olgan.
Delegatsiya rahbari, vazir maslahatchisi Umida Boyzoqova xitoy tomoniga oʻqishni tashkil etgani va ishtirokchilar uchun yaratilgan sharoitlar uchun minnatdorchilik bildirib, yosh mutaxassislarni yangi bilim va tajriba olish imkoniyatidan maksimal darajada foydalanishga chaqirdi.
Kunning ikkinchi yarmida delegatsiya Sichuan arxitektura texnologiyalari universitetining taʼlim muassasasi tashkil etilganining 70 yilligiga bagʻishlab ochilgan muzeyida boʻldi.
Ishtirokchilar universitet tarixi, uning rivojlanish bosqichlari hamda taʼlim va fan sohasidagi yutuqlari bilan tanishdilar. shundan soʻng ular oʻquv-amaliy laboratoriyalari, zamonaviy asbob-uskunalar va talabalar olingan bilimlarni amalda qoʻllashlari uchun yaratilgan sharoitlarni koʻzdan kechirdilar.
Stajirovka yosh arxitektorlarga kasbiy dunyoqarashini kengaytirishga, xalqaro tajribani oʻrganishga va Oʻzbekistonning qurilish hamda shaharsozlik amaliyotida qoʻllanilishi mumkin boʻlgan texnologiyalar bilan tanishishga yordam berishi kutilmoqda.