Oʻzbekistonda yana noqonuniy Umra safarlarini tashkil etish sxemalariga chek qoʻyildi
Oʻzbekistonda noqonuniy umra safarlarini tashkil etish bilan bogʻliq sxemalarga yana chek qoʻyildi
Andijon va Fargʻona viloyatlarida umra amalini bajarish uchun Saudiya Arabistoniga noqonuniy safarlarni tashkil etish boʻyicha yangi holatlar aniqlandi. Oʻzbekiston Davlat xavfsizlik xizmati maʼlumotlariga koʻra, ziyoratni tashkil qilishda yordam berish evaziga fuqarolardan bir necha ming dollar talab qilingan.
Jumladan, Andijonda umra safarlarini tashkil etish boʻyicha litsenziyaga ega boʻlmagan turistik firma xodimi huquq-tartibot idoralari eʼtiboriga tushdi. U Baliqchi tumanida yashovchi fuqaroga uning toʻrt nafar qarindoshini Saudiya Arabistoniga yuborishni taklif qilib, buning evaziga 4,4 ming dollar soʻragan. DXX va ichki ishlar organlari xodimlari tomonidan oʻtkazilgan hamkorlikdagi operatsiya davomida erkak pullarni olayotgan vaqtda ashyoviy dalillar bilan ushlandi.
Yana bir holat Fargʻona viloyatida aniqlandi. Toshloq tumanida yashovchi shaxs fargʻonalik ikki fuqaroga Namangan viloyatida faoliyat yuritayotgan turistik firma orqali ziyoratni tashkil qilishni vaʼda qilgan. Xizmat evaziga u 2,1 ming dollar talab qilgan, biroq 1 ming dollar miqdoridagi boʻnakni olayotgan vaqtda ushlangan.
Ushbu shaxslarga nisbatan jinoyat ishlari qoʻzgʻatilgan, tergov harakatlari olib borilmoqda.
Eslatib oʻtamiz, Oʻzbekistonda umra safarlarini tashkil etish uchun maxsus litsenziya talab etiladi. Bu Vazirlar Mahkamasining 2024 yil 12 oktyabrdagi 668-sonli qarorida nazarda tutilgan. Qoidalar ziyoratchilarning huquqlarini himoya qilish va ularning xavfsizligini taʼminlashga qaratilgan, biroq fuqarolar hali ham ularning ziyorat qilish istagidan foydalanadigan firibgarlarga duch kelmoqdalar.
Avvalroq shu kabi holatlar Toshkent va Fargʻona viloyatlarida aniqlangan edi. Tashkilotchilar tegishli litsenziya va ruxsatnomalarga ega boʻlmay turib, fuqarolarga umraga yuborishni taklif qilishgan.