Oʻzbekistonda xorijiy fuqarolarni roʻyxatdan oʻtkazish muddatlariga aniqlik kiritiladi
Qonun loyihasi xorijliklarni roʻyxatdan oʻtkazish muddatlarini kalendar kunlarda hisoblashga oʻtishni va migratsiya sohasidagi terminologiyani yangilashni nazarda tutadi.
Oʻzbekistonda xorijiy fuqarolarni roʻyxatdan oʻtkazish muddatlariga aniqlik kiritiladi
Oʻzbekiston Oliy Majlisi Qonunchilik palatasi deputatlari birinchi oʻqishda migratsiya va personallashtirish boʻlinmalari faoliyatini takomillashtirishga qaratilgan ayrim qonun hujjatlariga oʻzgartish va qoʻshimchalar kiritish toʻgʻrisidagi qonun loyihasini maʼqulladilar.
Hujjatda xorijiy fuqarolar va fuqaroligi boʻlmagan shaxslarni turgan joyi boʻyicha roʻyxatdan oʻtkazish muddatlariga aniqlik kiritish nazarda tutilgan. Xususan, amaldagi qonunchilikda nazarda tutilgan oylar bilan hisoblanadigan muddatlarni kalendar kunlardagi muddatlarga almashtirish taklif etilmoqda.
Qonun loyihasida qayd etilishicha, bunday yondashuv roʻyxatdan oʻtkazish muddatlarini yanada aniq belgilash va amaliyotda tegishli normalarning turlicha talqin qilinishini istisno etish imkonini beradi.
Bundan tashqari, migratsiya va personallashtirish sohasidagi davlat organlarining vakolatlari va ularning nomlarini amaldagi tashkiliy tuzilmaga muvofiqlashtirish uchun bir qator qonun hujjatlariga oʻzgartishlar kiritish taklif qilinmoqda.
Xususan, «migratsiya va fuqarolikni rasmiylashtirish» atamasini «migratsiya va personallashtirish» taʼrifiga almashtirish taklif etilmoqda. Bu qonunchilikda atamalarning bir xilda qoʻllanilishini taʼminlashi kerak.
Deputatlarning fikricha, qonun loyihasining qabul qilinishi xorijiy fuqarolar va fuqaroligi boʻlmagan shaxslarning noqonuniy mehnat faoliyatining oldini olishga, migratsiya sohasidagi davlat xizmatlari samaradorligini oshirishga hamda qonunchilik normalarini muvofiqlashtirishga xizmat qiladi.