Oʻzbekistonda suv boʻyidagi turizm obʼyektlari uchun imtiyozlar joriy etilmoqda
Oʻzbekistonda suv boʻyidagi turizm obʼyektlari uchun imtiyozlar joriy etilmoqda
Suv omborlari va ularga tutash hududlarda turizmni rivojlantirayotgan Oʻzbekiston tadbirkorlariga soliqlar kamaytiriladi va bojxona toʻlovlari boʻyicha kechiktirish beriladi. Bu imtiyozlar 2029 yil 1 oktyabrgacha amal qiladi.
Tegishli qaror Prezidentning 2026 yil 27 oktyabrdagi qarori bilan mustahkamlandi.
Yuridik shaxslar uchun yer soligʻi va mol-mulk soligʻi stavkalari amaldagi miqdorlarning 50 foizi darajasida belgilanadi. Bundan tashqari, suv transporti uchun GPS-uskunalari, qutqaruv va himoya vositalari, shuningdek, zamonaviy sanitariya-gigiyena modullari olib kirilganda bojxona toʻlovlarini 120 kungacha kechiktirish yoki boʻlib-boʻlib toʻlash mumkin boʻladi.
Imtiyozlar bilan bir vaqtda xavfsizlik va ekologiya boʻyicha qaʼtiy talablar joriy etilmoqda. Turistik obʼyektlar tashrif buyuruvchilarni himoya qilishning zarur vositalari bilan jihozlangan boʻlishi, favqulodda vaziyatlar uchun esa oʻz qutqaruv xizmatini tashkil etishi yoki professional qutqaruvchilar bilan shartnoma tuzishi kerak.
Tadbirkorlar, shuningdek, kichik hajmli kemalar va ularning toʻxtash joylarini ekspluatatsiya qilish qoidalariga rioya etishlari, bundan tashqari, obʼyektlarni ichki kanalizatsiya va lokal oqova suvlarni tozalash inshootlari bilan jihozlashlari lozim. Tozalanmagan oqova suvlarni suv havzalariga oqizish taqiqlanadi, maishiy chiqindilarni esa belgilangan tartibda utilizatsiya qilish zarur.
Avvalroq Buxoro viloyatining Peshku tumanida keng jamoatchilik muhokamasiga sabab boʻlgan yangi suv havzasi paydo boʻlgan edi. Gidrometeorologiya ilmiy-tadqiqot instituti olimlari uni oʻrganib, kelib chiqishini tushuntirib berishdi.