Oʻzbekistonda OAVdagi nashrlarni ekstremizm boʻyicha monitoring qilish qonunan mustahkamlandi
Oʻzbekistonda OAVni ekstremizmga qarshi monitoring qilish qonunchilik darajasida mustahkamlandi
Oʻzbekistonda ekstremizm bilan bogʻliq materiallarni aniqlash uchun ommaviy axborot vositalarini monitoring qilish qonunan tasdiqlandi. Tekshiruv, shuningdek, telekommunikatsiya tarmoqlari va internetdagi nashrlarga ham tatbiq etiladi. Tegishli tuzatishlar prezident tomonidan 2 noyabrda imzolangan «Ekstremizmga qarshi kurashish toʻgʻrisida»gi qonunga kiritildi.
Hujjat ekstremizm bilan bogʻliq tahdid va xavflarni monitoring qilishga bagʻishlangan yangi 5-3-modda bilan toʻldirilmoqda. Unda ekstremizmning yuzaga kelishi uchun shart-sharoit yaratadigan jarayonlar haqidagi axborotni yigʻish, tahlil qilish va baholash tushuniladi.
Bunday ishlarni ekstremizmga qarshi kurashish bilan shugʻullanuvchi davlat organlari, shuningdek, tegishli vakolat berilgan boshqa idoralar olib boradi.
11-moddaga koʻra, ekstremistik materiallarni aniqlash usullaridan biri OAVda, telekommunikatsiya tarmoqlarida, veb-saytlarda, sahifalarda va boshqa internet-resurslarida joylashtirilgan axborotlarni monitoring qilish boʻladi.
Bundan tashqari, vakolatli organlar bunday materiallarni tekshirishlar davomida, fuqarolar va tashkilotlarning murojaatlarini, shuningdek, ommaviy axborot vositalarida eʼlon qilingan xabarlarni koʻrib chiqish jarayonida aniqlashlari mumkin boʻladi. Qonun, shuningdek, qonunchilik bilan taqiqlanmagan boshqa usullarga ham ruxsat beradi.
Qonunning alohida normalari ekstremizm bilan bogʻliq jinoyatlar uchun sudlangan fuqarolarga tegishlidir. Sudlanganlik holati tugallanguniga yoki olib tashlanguniga qadar ularga jurnalistik, maʼrifiy va psixologik faoliyat bilan shugʻullanish, shuningdek, ommaviy axborot vositalari muassislari sifatida chiqish taqiqlanadi.
Shunday qilib, cheklovlar barcha jurnalistlar va OAV vakillariga emas, balki faqat tegishli jinoyatlar uchun sudlangan shaxslarga daxldordir. Taqiq sudlanganlik tugallanguniga yoki olib tashlanguniga qadar amal qiladi.
Shu bilan birga, qonunda bunday fuqarolar uchun ijtimoiy moslashuv choralari nazarda tutilgan. Ularga ijtimoiy, huquqiy, tibbiy va psixologik yordam koʻrsatiladi, taʼlim olish, kasb egallash va ishga joylashishda koʻmaklashiladi. Jazoni oʻtab boʻlgach, individual moslashuv dasturi bir yilgacha amal qilishi mumkin.
Tahdid va xavflar monitoringi yakunlari ekstremizmning oldini olish va unga qarshi kurashish boʻyicha davlat siyosati doirasida foydalaniladi. Xususan, ular tegishli davlat dasturini ishlab chiqishda hisobga olinadi. Uning tayyorgarligi bilan Davlat xavfsizlik xizmati boshqa idoralar bilan birgalikda shugʻullanadi, hujjatni esa prezident tasdiqlaydi.